ءبىز بىرگەمىز: ارىستاعى جاعداي تۋرالى جاڭا ءان جارىققا شىقتى

نۇر-سۇلتان. قازاقپارات - ارىستاعى قايعىلى وقيعاعا ارنالعان «ءبىز بىرگەمىز» اتتى جاڭا ءان جارىققا شىقتى، دەپ حابارلايدى قازاقپارات مادەنيەت جانە سپورت مينيسترلىگىنىڭ باسپا ءسوز حاتشىسى ايدار قىرىقبايعا سىلتەمە جاساپ.

قازاقستاندىق جۇلدىزدار 24 -ماۋسىمدا جارىلىستان زارداپ شەككەن ارىس پەن ونىڭ تۇرعىندارىنا ارناپ ءان جازدى. بۇل تۋرالى مادەنيەت جانە سپورت مينيسترلىگىنىڭ باسپا ءسوز حاتشىسى ايدار قىرىقباي ءوزىنىڭ Facebook پاراقشاسىندا جازدى.

«ءبىز بىرگەمىز!» دەپ اتالاتىن جاڭا تۋىندىنىڭ ءانىن جازعان - تالانتتى كومپوزيتور رينات گايسين، ال ءسوزى - ايتىسكەر اقىن دانيار الدابەرگەنوۆتىكى.

«بۇل شىعارمادا ارىستىقتار باستان وتكەرگەن قيىن- قىستاۋ كۇندەر تۋرالى ايتىلادى. شاعىن قالاداعى قايعىلى جاعداي ەشكىمدى بەي-جاي قالدىرمادى. بۇكىل قازاقستاندىقتاردى بىرىكتىرگەن وقيعا تۋرالى ءاندى ءبىرقاتار قازاقستاندىق جۇلدىزدار بىرگە شىرقاعان» دەلىنگەن حابارلامادا.

جاڭا تۋىندىنى جانار دوعالوۆا، نۇربولات ابدۋللين، دينايا، مارجان اراپبايەۆا، بەيبىت قوشقاليەۆ، ءالي وقاپوۆ، ايري جانە نۇرجان كەرمەنبايەۆ سەكىلدى انشىلەر ورىندايدى.

ەسكە سالا كەتسەك، ارىس قالاسىنداعى اسكەري ءبولىمنىڭ قويماسىندا 24 -ماۋسىم كۇنى تاڭەرتەڭ جارىلىس بولدى. سالدارىنان ءۇش ادام قازا تاپتى - ارىس تۇرعىنى مەن ەكى اسكەري قىزمەتشى. 170 كە جۋىق ادام زارداپ شەكتى. 20 عا جۋىق ءۇي، 9 قورا-قوپسى جانىپ، دالالى اۋماقتا 14 وشاق تۇتاندى. ءۇي-جايلار مەن عيماراتتاردىڭ 80-90 پايىزىنا ءارتۇرلى دەڭگەيدە زاقىم كەلدى. ءبىرقاتار وڭىردە شۇعىل جەلىلەر قۇرىلدى.

تۇركىستان وبلىسىنا ارنايى بارعان قازاقستان پرەزيدەنتى قاسىم-جومارت توقايەۆ ارىستاعى اسكەري بولىمشەدەگى وق-ءدارى قويماسىنداعى جارىلىستان زارداپ شەككەن قالا تۇرعىندارىمەن كەزدەسىپ، قالانىڭ قالپىنا كەلتىرىلەتىنىنە ۋادە بەردى.