قاسىم-جومارت توقايەۆ دومبىرا كۇنىنە ارنالعان مەرەكەلىك كونسەرتتى تاماشالاۋدا

نۇر-سۇلتان. قازاقپارات - ەلورداداعى «قازاق ەلى» مونۋمەنتىنىڭ الدىندا ۇلتتىق دومبىرا كۇنىنە ارنالعان مەرەكەلىك كونسەرت ءوتىپ جاتىر.

كونسەرتتى قازاقستان پرەزيدەنتى قاسىم-جومارت توقايەۆ تاماشالاۋدا، دەپ حابارلايدى قازاقپارات ءتىلشىسى.

«قازاق ەلى» مونۋمەنتىنىڭ الدىنداعى الاڭداعى ۇلكەن ساحنادا ءبىر مىڭنان استام دومبىراشى «سارىارقا»، «اداي»، «ءالقيسسا»، «كوڭىل تولقىنى»، «بالبىراۋىن» جانە «كورەع ۇلى» كۇيلەرىن توگىلتەدى. كۇمبىرلەگەن كۇيدەن بولەك جينالعان كورەرمەن نازارىنا «جاستار» تەاترىنىڭ اكتەرلەرى تاريحي قويىلىمىن ۇسىنادى، ەلوردالىق مۋزىكا مەكتەپتەرىنىڭ شاكىرتتەرى ونەرلەرىن ورتاعا سالادى، اقىندار ايتىسى وتەدى. سۋىرىپ سالما ولەڭگە ىسىلعان جاندار ۇلتتىق مۋزىكالىق اسپابىمىز - دومبىرانى جىرعا قوسادى.

سونىمەن قاتار، «قازاق ەلى» مونۋمەنتىنىڭ الدىنداعى الاڭدا كيىز ۇيلەر تىگىلىپ، قازاق اۋىلى ورىن تەپكەن. كەلۋشىلەر دومبىرانىڭ جانە باسقا دا ۇلتتىق اسپاپتاردىڭ ءتۇر-تۇرىمەن تانىسۋعا مۇمكىندىكتەرى بار.

مەرەكە كەشكە ەسىل وزەنىنىڭ جاعاسىنداعى امفيتەاتردا «ناعىز قازاق - دومبىرا» كونسەرتىمەن جالعاسادى. ساحنا تورىندە قازاق وركەسترى، نۇر-سۇلتان قالاسى اكىمدىگى مەملەكەتتىك اكادەميالىق فيلارمونياسىنىڭ سوليستەرى مەن ۆوكاليستەرى ونەر كورسەتەدى. كونسەرتتىڭ باستالۋى - ساعات 18.00-دە. كىرۋ - تەگىن.

ەسكە سالايىق، وتكەن جىلى ۇلتتىق دومبىرا كۇنىنە وراي «قازاق ەلى» مونۋمەنتىنىڭ الدىنداعى الاڭدا دومبىرانىڭ قۇلاعىندا وينايتىن 2 مىڭنان اسا ونەرپازدان قۇرىلعان وركەستر ءوز ونەرىن ورتاعا سالدى. فلەشموبقا قاتىسۋ ءۇشىن ەلىمىزدىڭ وڭىرلەرىنەن دە دومبىراشىلار ەلورداعا ات باسىن تىرەدى. شارانى ەلباسى نۇرسۇلتان نازاربايەۆ تاماشالادى.

ايتا كەتەيىك، بۇل قالا تاريحىنداعى ايتۋلى وقيعا بولدى. «كوڭىل اشار»، «اداي»، «بالبىراۋىن»، «ەركە سىلقىم» جانە «سارىارقا» كۇيلەرىن ورىنداعان دومبىراشىلارعا ق ر ەڭبەك سىڭىرگەن قايراتكەرى، كومپوزيتور ايتقالي جايىموۆ ديريجەرلىك ەتتى. 1 -شىلدەدە وتكەن ۇلتتىق دومبىرا كۇنىنە ارنالعان كونسەرتكە بەلگىلى مۋزىكانتتار، قوعام جانە مەملەكەت قايراتكەرلەرى، ونىڭ ىشىندە ق ر پارلامەنتى ءماجىلىسىنىڭ دەپۋتاتى بەكبولات تىلەۋحان، نۇر-سۇلتان قالاسىنىڭ مادەنيەت جانە سپورت باسقارماسىنىڭ باسشىسى بولات ماجاعۇلوۆ، قازاقستاننىڭ ەڭبەك سىڭىرگەن ءارتيسى ايگۇل ۇلكەنبايەۆا، نۇركەن ءاشىروۆ، ديريجەر ارمان جۇلدەبايەۆ، «باستاۋ» توبى، «سەرپەر»، «اسىل توبى»، «مۋزارت»، اسىلبەك ەڭسەپوۆ جانە باسقالارى قاتىستى. بىلتىرعى قاتىسۋشىنىڭ ەڭ كىشكەنتايى 7 جاستا، ال ەڭ ۇلكەنى - 75 تە بولدى. شارا بارىسىندا ەڭ جاس قاتىسۋشىعا ەلباسى ءوز قولىمەن دومبىرا تارتۋ ەتتى.

ۇلتتىق دومبىرا كۇنى 2018 -جىلى قازاقستان رەسپۋبليكاسىنىڭ تۇڭعىش پرەزيدەنتىنىڭ جارلىعىمەن بەكىتىلدى جانە جىل سايىن شىلدەنىڭ ءبىرىنشى جەكسەنبىسىندە اتالىپ وتىلەدى.