ەلوردادا «قاسيەتتى قازاق ەلى» ءداستۇرلى حالىقارالىق ونەر فەستيۆالى وتۋدە
فەستيۆالدىڭ اشىلۋ شاراسىندا دۇنيەجۇزى قازاقتارى قاۋىمداستىعى ءتوراعاسىنىڭ ورىنباسارى زاۋىتبەك تۇرىسبەكوۆ ءسوز سويلەپ، ونەر بايگەسىنە قاتىسۋشى شەتەلدەن كەلگەن قانداستارىمىزدى ەلوردا كۇنىمەن قۇتتىقتادى. سونىمەن قاتار، دۇنيەجۇزى قازاقتارى قاۋىمداستىعى قولعا العان جوبالارمەن تانىستىردى.
«ەلباسىنىڭ ساياساتىنىڭ ارقاسىندا 27 جىلدا 1 ميلليون قازاق ەلگە ورالدى. بۇگىنگى كۇنى تاعى دا 1 ميلليون قانداسىمىز ەلگە ورالامىز دەپ نيەتتەنىپ وتىر. ءبىراق، ءبىز ولارعا ءتيستى جاعداي جاساۋىمىز كەرەك. ءار كەلگەن وتباسىنى جۇمىس پەن باسپانامەن قامتاماسىز ەتۋمىز قاجەت. سونىڭ توڭىرەگىندە 2 جوبانى باستادىق. بىرەۋى نۇر- سۇلتان قالاسىنىڭ جانىندا، ەكىنشىسى سارىاعاش اۋدانىندا. اماندىق بولسا ول ۇلكەن باستاما بولادى. ءارى قاراي كەلگەن ازاماتتارعا ءتيىستى جاعدايدىڭ ءبارىن جاسايمىز دەپ جوسپارلاپ وتىرمىز» ، - دەدى زاۋىتبەك تۇرىسبەكوۆ.
«وتانداستار» قورىنىڭ ۆيتسە- پرەزيدەنتى ماعاۋيا سارباسوۆتىڭ اتاپ وتۋىنشە، بۇل فەستيۆال اقپارات جانە قوعامدىق دامۋ مينيسترلىگى مەن نۇر- سۇلتان قالاسى اكىمدىگىنىڭ قولداۋىمەن ءوتىپ جاتىر.
«قاسيەتتى قازاق ەلى» اتتى ءداستۇرلى حالىقارالىق ونەر فەستيۆالىنە 10 نان استام ەلدەن 50 گە جۋىق قانداسىمىز قاتىسۋدا. قاتىسۋشىلاردىڭ دەنى جاستار. شارانىڭ ماقساتى ۇلتتىق مادەنيەتىمىزدى، سالت- ءداستۇرىمىزدى دارىپتەۋ، تاراتۋ جانە ەڭ باستىسى تالاناتتى جاستاردى انىقتاپ، ناقتى قولداۋ كورسەتۋ. ماسەلەن، قولداۋ شارالارىنىڭ اياسىندا ەلورداداعى قازاق ۇلتتىق ونەر ۋنيۆەرسيتەتىنە وسى فەستيۆالدىڭ جەڭىمپازدارىن وقۋعا ءتۇسىرۋ پىسىقتالىپ جاتىر» ، - دەدى ول.
فەستيۆال ءمۇشايرا، تەرمە، حالىقتىق قولدانبالى ونەر، ۆوكال (ءداستۇرلى ءان سالۋ) اتالىمدارى بويىنشا وتەدى. وعان قىتاي، موڭعوليا، رەسەي، وزبەكستان، تۇركيا، يران، وڭتۇستىك كورەيا، شۆەتسيا سياقتى ەلدەردەن وكىلدەر كەلگەن. قاندانداستارىمىزدىڭ ونەرىن قالقامان سارين، داۋلەتكەرەي كاپ ۇلى، ايگۇل قوسانوۆا سىندى ەسىمى ەلىمىزگە بەلگىلى ازاماتتار باعالايدى.
