گرۋزيا پارلامەنتىنە شابۋىل: ءىس «بيلىكتى باسىپ الۋعا ارەكەت» بابىنا اۋىستىرىلدى

گرۋزيانىڭ باس پروكۋراتۋراسى جالعاسىپ جاتقان تەرگەۋ جۇمىستارى كەزىندە 20-21- ماۋسىم كۇندەرى تبيليسيدەگى پارلامەنت عيماراتىنىڭ الدىندا بەلگىلى ءبىر تۇلعالار «بيلىكتى باسىپ الۋ ماقساتىندا مەملەكەتتىك توڭكەرىس ۇيىمداستىرماق بولعانىن انىقتادى».

«بۇل ارەكەتتى ىسكە اسىرۋدىڭ العاشقى كەزەڭىندە پارلامەنت عيماراتىن شابۋىلمەن الۋ كوزدەلدى. كەيىن، بيلىكتى باسىپ الۋ بويىنشا ودان ارعى ءىس-ارەكەتتەر جالعاسپاق بولعان.

بۇل ارەكەتكە قۇقىق قورعاۋ ورگاندارى توسقاۋىل بولدى»، - دەلىنگەن بەيسەنبى كۇنى جاريالانعان پروكۋراتۋرانىڭ مالىمەتىندە.

قۇجاتتا اتاپ وتىلگەندەي، تەرگەۋ گرۋزيا قىلمىستىق كودەكسىنىڭ 225- (جاپپاي تارتىپسىزدىكتەردى ۇيىمداستىرۋ) جانە 315-(ەلدىڭ كونستيتۋتسيالىق قۇرىلىمىن كۇشپەن وزگەرتۋ ماقساتىندا استىرتىن ءسوز بايلاسۋ نەمەسە بۇلىك شىعارۋ) باپتارى بويىنشا جالعاسادى.

بۇعان دەيىن باسىلىم گرۋزيانىڭ ىشكى ىستەر ۆيتسە-ءمينيسترى ۆلاديمير بورتسۆادزەگە سىلتەمە جاساپ، اكسيا كەزىندە توپ بولىپ كۇش كورسەتتى دەگەن كۇدىكپەن 4 ادام ۇستالعانىن حابارلادى.

«ىشكى ىستەر مينيسترلىگىندە 2019-جىلدىڭ 20-21- ماۋسىمىندا پارلامەنت عيماراتىنىڭ الدىندا بولعان وقيعالارعا بايلانىستى تەرگەۋ قارقىندى جۇرگىزىلۋدە... اتالمىش ءىس اياسىندا سوت ۇكىمى نەگىزىندە توپ بولىپ كۇش كورسەتۋ ايىبىمەن بۇگىن (4- شىلدە - رەد.) تاعى 4 ادام ۇستالدى. قىلمىس 6 دان 9 جىلعا دەيىن باس بوستاندىعىنان ايىرۋدى كوزدەيدى. (...) تەرگەۋ كەزىندە انىقتالعانداي، 20-21- ماۋسىم كۇندەرى پارلامەنت الدىنداعى اۋماقتا اتالمىش تۇلعالار توپ بولىپ كۇش كورسەتۋلەرگە قاتىسقان. بۇل رەتتە ولار ءتۇرلى زاتتاردى پايدالانا وتىرىپ، پوليتسەيلەرگە شابۋىل جاساعان، ولارعا قارسىلىق كورسەتكەن»، - دەپ كەلتىرەدى پورتال ۆيتسە-ءمينيستردىڭ ءسوزىن.

ەسكە سالايىق، 20- ماۋسىم كۇنى گرۋزيادا ۇكىمەت مۇشەلەرىنىڭ وتستاۆكاعا كەتۋىن تالاپ ەتكەندەر پارلامەنت عيماراتىنا شابۋىل جاسادى. ەرەۋىلدى باسۋ ءۇشىن پوليتسيا كوز جاساۋراتاتىن گاز، رەزەڭكە وقتار جانە سۋاتقىشتاردى قولدانۋعا ءماجبۇر بولدى. تارتىپسىزدىكتەر 20- ماۋسىم كۇنى رەسەي دەلەگاتسياسىنىڭ تبيليسيدە وتكەن پراۆوسلاۆيە پارلامەنتارالىق باس اسسامبلەياسىنا قاتىسۋىنان كەيىن باستالدى.

دەلەگاتسيانى باستاپ كەلگەن ر ف مەملەكەتتىك دۋماسىنىڭ دەپۋتاتى سەرگەي گاۆريلوۆتىڭ سەسسيا كەزىندە گرۋزيا پارلامەنتى سپيكەرىنىڭ كرەسلوسىنا وتىرىپ، جينالعاندارعا ورىس تىلىندە سويلەگەنى وپپوزيتسيانىڭ نارازىلىعىن تۋدىرعان. مۇنى قورلاۋ دەپ باعالاعان گرۋزيانىڭ وپپوزيتسيالىق دەپۋتاتتارى نارازىلىقتارىن ءبىلدىرىپ، باس اسسامبلەيانىڭ جۇمىسىن توقتاتتى.

فرانس پرەسس اگەنتتىگىنىڭ حابارلاۋىنشا، 10 مىڭعا جۋىق ادام پارلامەنت عيماراتىنىڭ الدىنا جينالىپ، پوليتسيانىڭ قۇرعان شەبىن جارىپ ءوتىپ، پارلامەنت سپيكەرى يراكلي كوباحيدزە جانە باسقا دا رەسمي تۇلعالاردىڭ وتستاۆكاعا كەتۋىن تالاپ ەتكەن.