مادەنيەت ءمينيسترى بەكزات ساتتارحانوۆتىڭ اتا- اناسىمەن كەزدەستى
ۆەدومستۆو باسشىسى بەكزاتتاي ۇلدى تاربيەلەگەن اتا- اناسىنا قۇرمەت ءبىلدىرىپ، العىس حات تابىستادى. «قازاقستان رەسپۋبليكاسى مادەنيەت جانە سپورت مينيسترلىگىنىڭ جانە ءوز اتىمنان سىزدەرگە قازاق ەلىنىڭ ءبىرتۋار ۇلى، حالقىنىڭ ماقتانىشى، سپورت الەمىندە اتى التىن ارىپپەن جازىلعان بەكزاتتاي ۇلدى تاربيەلەپ، وسىرگەندەرىڭىز ءۇشىن ءوز العىسىمدى بىلدىرەمىن. بەكزاتتىڭ جارقىن بەينەسى وسكەلەڭ ۇرپاق ءۇشىن ۇلكەن تاربيەلىك مانگە يە دەپ بىلەمىن» ، - دەپ اتاپ ءوتتى مينيستر.
وليمپيادا چەمپيونىنىڭ اكەسى سەيىلحان ساتتارحانوۆ جاپونيا استاناسى توكيودا 2020 -جىلى وتەتىن وليمپيادا ويىندارىندا بوكستان قازاقستان قۇراماسىنا ساتتىلىك تىلەپ، جىلى لەبىز ءبىلدىردى. اناسى سىرلىكۇل ساتتارحانوۆا باس جۇلدەمەن ورالعان ۇلىنىڭ «بۇل تەك مەنىڭ عانا جەڭىسىم ەمەس. بۇل - بۇكىل ەلىمنىڭ جەڭىسى. مەن ءالى ءۇش دۇركىن وليمپيادا چەمپيونى بولامىن» ، - دەپ ايتقانىن ەسكە الدى. سونداي- اق، بەكزاتتىڭ اتا- اناسى تۇركىستان قالاسىنداعى مەكتەپكە جانە نۇر- سۇلتان قالاسىنداعى كوشەگە بەكزاتتىڭ ەسىمىن بەرۋ جونىندە ۇسىنىس ءبىلدىردى. ءوز كەزەگىندە مينيستر اقتوتى رايىمقۇلوۆا وسى باعىتتا ءتيىستى جۇمىستاردى پىسىقتاۋعا تاپسىرما بەردى.
قازاقستاندىق بوكسشى بەكزات ساتتارحانوۆ 2000 -جىلى سيدنەي قالاسىندا وتكەن 57 كەلى سالماقتا بوكستان جازعى وليمپيادا ويىندارىنىڭ جەڭىمپازى. بوكسپەن 15 جاسىنان شۇعىلدانا باستادى، سوعان قاراماستان 20 جاسىندا وليمپيادا جەڭىمپازى اتاندى. 1998 -جىلى جاستار اراسىندا ازيا بىرىنشىلىگىنىڭ كۇمىس جۇلدەگەرى، 1998 -جىلى جاستار اراسىندا الەم چەمپيوناتىنىڭ كۇمىس جۇلدەگەرى، 1999 -جىلى ازيا بىرىنشىلىگىنىڭ كۇمىس جۇلدەگەرى، 1999 -جىلى ورتا- ازيالىق مەملەكەتتەرىنىڭ جەڭىمپازى. وكىنىشكە وراي 2000 -جىلى 31 - جەلتوقساندا جاڭا جىل قارساڭىندا ورداباسى اۋدانىندا جول اپاتىنان قايتىس بولدى. قازىرگى ۋاقىتتا ب. ساتتارحانوۆ اتى بەرىلگەن شىمكەنت قالاسىندا دارىندى بالالارعا ارنالعان سپورتتىق مەكتەپ- ينتەرنات، كەنتاۋ قالاسىندا كەشەندى بالالار- جاسوسپىرىمدەر سپورت- مەكتەبى بار. تۇركىستان قالاسىندا داڭعىلداردىڭ بىرىنە بەكزاتتىڭ ەسىمى بەرىلگەن. 2007 -جىلدان باستاپ جىل سايىن بوكستان بەكزات ساتتارحانوۆ اتىنداعى جاستار اراسىنداعى حالىقارالىق تۋرنير وتەدى. ايتا كەتەيىك، وليمپيادا چەمپيونى تۋرالى مۇرات بيدوسوۆ تۇسىرگەن «بەكزات» اتتى كوركەم فيلمنىڭ جابىق كورسەتىلىمى وتكەن بولاتىن. كينولەنتا «حابار» اگەنتتىگىنىڭ تاپسىرىسى بويىنشا ءتۇسىرىلدى. فيلمدە سپورتشىنىڭ ءومىرى، كارەراسىنىڭ باستالعان كەزى باياندالعان.