استانا كۇنىنە تارتۋ رەتىندە الماتىلىقتار نۇرسۇلتان شىڭىن باعىندىرادى

«الماتى سپورتى» الەۋمەتتىك جوباسى مەن الماتى قالالىق سپورت باسقارماسى اتالعان الپينياداعا قاتىسۋعا بارلىق الپينيستەر مەن حايكينگ سۇيەتىن ازاماتتاردى، قوناقتاردى شاقىرادى. بۇل ساپار جاڭادان باستاپ كەلە جاتقان سپورتشىلار ءۇشىن 2ا ساناتىنداعى كۇردەلى ساپار بولماق. وعان مىندەتتى تۇردە الپينيستەردىڭ قاتىسۋىمەن بارۋعا كەڭەس بەرىلەدى. تاۋعا 12 جاستان اسقان بالالارعا دا شىعۋعا رۇقسات بەرىلەدى. ءبىراق، قاستارىندا ەرەسەك ادامدار بولۋى شارت.

«سپورتشىلارعا كاسكا، قارا كوزىلدىرىك، كۇننەن قورعايتىن كرەم، تاۋعا كيەتىن باتەڭكە، جەلدەن قورعايتىن كوستيۋم، شاڭعى تاياعى، ءىشىپ جەيتىن زاتتار الىپ شىعۋ كەرەك. جارتاستى ۋچاسكەلەردەن تەك كاسكاسى مەن ساقتاندىرۋ قۇرالى بارلارعا عانا وتۋگە رۇقسات بەرىلەدى. الپينياداعا قاتىسۋ ءۇشىن www.falp.kz سايتىندا تىركەلۋ كەرەك. الماتى سپورتى سايتىنان 87272913324, 87473804781 اقپارات الۋعا بولادى» ، - دەلىنگەن حابارلامادا.

الپينيادا باعدارلاماسى: تاڭعى 05:30 دا قاتىسۋشىلار مەدەۋ (1600م) - شىمبۇلاق (2380م) - تالعار اسۋى (3200م) - بوگدانوۆيچ مۇزدىعى (3600م) - ودان ءارى مارشرۋت-1 نەمەسە مارشرۋت-2 بويىنشا جىلجيدى. مارشرۋت-1: بوگدانوۆيچ مۇزدىعى - كومسومول اسۋى (4000م) - نۇرسۇلتان شىڭى، 4376م؛ مارشرۋت-2: بوگدانوۆيچ مۇزدىعى - فيزكۋلتۋرنيك اسۋى (4000) - ق ح ا شىڭى، 4068م (فيزكۋلتۋرنيك) .