ديماش قۇدايبەرگەننىڭ شەتەلدىك فاناتتارى بۋرابايدا بولدى
اقمولا وبلىسى «Visit Aqmola» تۋريستىك اقپارات ورتالىعىنىڭ مالىمەتىنشە، ءبىر كەزدەرى ديماشتىڭ العاشقى كونسەرتتەرى وسىندا وتكەن. «تالانتىمەن الەمدى ءتانتى ەتكەن ديماش قۇدايبەرگەننىڭ جانكۇيەرلەرى مەن فاناتتارى نۇر- سۇلتان قالاسىندا وتكەن كونسەرتتەن كەيىن قازاقستاننىڭ ءىنجۋ- مارجانى - بۋراباي كۋرورتىنا كەلىپ دەمالدى. قوناقتاردىڭ اراسىندا قىتاي، تايۆان، شۆەتسيا، فرانسيا، يتاليا، سلوۆەنيا، دانيا، تۇركيا، مالتا، يرلانديا، فينليانديا، جاڭا زەلانديا جانە حورۆاتيا ەلدەرىنەن 27 شەتەلدىك بار» ، - دەيدى ۆەدومستۆودان.
قوناقتار ءۇشىن بۋرابايدىڭ كيەلى جەرلەرى، ونىڭ ىشىندە ابىلاي حان الاڭى، «حان اسۋى» ، بولەكتاۋ توبەسىنە شىعۋ ءتارىزدى كورىكتى جەرلەرگە ساياحات ۇيىمداستىرىلدى. «اقمولا وبلىسىنىڭ تۋريزم باسقارماسى مەن دەمالىس جانە تۋريزم يندۋسترياسى قاۋىمداستىعى قوناقتارعا اقمولا وبلىسىنىڭ تۋريستىك الەۋەتى تۋرالى ايتىپ بەردى. مەيماندار بۋراباي كۋرورتىنداعى 12 مىڭ كورەرمەن جايعاسا الاتىن حالىقارالىق دەڭگەيدەگى ترامپلين كەشەنىمەن تانىستى. جانكۇيەرلەرى سۇيىكتى ءانشىسى ديماشتىڭ كونتسەرتىن الداعى ۋاقىتتا وسى بۋراباي كۋرورتىندا وتكىزۋ تۋرالى ۇسىنىس ايتتى» ، - دەپ تولىقتىردى ۆەدومستۆودان.
شەتەلدىكتەرگە ءوڭىردىڭ كۋرورتتىق الەۋەتى تۋرالى ەستەلىك سىيلىقتار ۇلەستىرىلدى. ديماشتىڭ جانكۇيەرلەرىنە بۋراباي كۋرورتىنا ساياحات ۇيىمداستىرعان جوبانىڭ جەتەكشىسى مەيرامگۇل بالعوجينا شەكسىز العىسىن ءبىلدىردى.