دومبىرا كۇنى: سەمەي اۆتوبۋستارىندا قۇرمانعازى كۇيلەرى كۇمبىرلەدى
سەمەيدە ف. دوستويەۆسكيي اتىنداعى ادەبي- مەموريالدىق مۇراجاي قىزمەتكەرلەرى مەن تاتار ونەر مەكتەبىنىڭ ۇيىمداستىرۋىمەن دومبىرا كۇنىنە وراي ارنايى اكسيا ءوتتى. شارا بارىسىندا ونەرپازدار قالا ىشىندە قاتىنايتىن اۆتوبۋستاعا ءمىنىپ، قۇرمانعازىنىڭ كۇيلەرىمەن جولاۋشىلاردىڭ كوڭىلىن كوتەرگەن.
«اكتسيا اياسىندا جولاۋشىلارعا XVIII - ⅩⅩعاسىرداعى كۇيشىلەر تۋرالى ۆيكتورينالىق سۇراقتار قويىپ، جەڭىمپازدارعا وتباسىلارىمەن مۇراجايعا بيلەت تابىستادىق. تاريحقا كوز جۇگىرتسەك، شوقان ءۋاليحانوۆ پەن فەدور دوستويەۆسكي اراسىندا قازاق ونەرىنە دەگەن ورتاق جاناشىرلىق بولعان. دوستويەۆسكي اتىنداعى مۋزەيدىڭ بۇل شاراعا مۇرىندىق بولۋى - سول ساباقتاستىقتىڭ جالعاسىنداي» ، - دەدى مۋزەيدىڭ ءبولىم مەڭگەرۋشىسى سالتانات نۇرلىبەك قىزى.
جاستاردىڭ يگى باستاماسىن ءىلىپ اكەتىپ، قولعا دومبىرا الىپ، كوپشىلىككە كۇي ورىنداپ بەرگەن جاندار دا تابىلدى.
«بۇگىن، مىنە، اۆتوبۋستا دومبىرانىڭ ءۇنىن ءوز قۇلاعىمىزبەن ەستۋ مارەبەسىنە يە بولدىق . وسىنداي شارالار اتاۋلى كۇندەردەن باسقا كەزدە دە وتكىزىلىپ تۇرسا دەگەن نيەتتەمىز. بارشا ۇيىمداستىرۋشىلارعا العىسىمىز شەكسىز» ، - دەيدى قالا تۇرعىنى نازىم كەلەربەكوۆا.