قوستاناي ارتىستەرى قويىلىمنان تۇسكەن قاراجاتتى ارىسقا اۋداردى

قوستاناي. قازاقپارات - قوستاناي وبلىستىق ءى. وماروۆ اتىنداعى قازاق دراما تەاترى ءوزىنىڭ  ⅩⅨ ماۋسىمىن قورىتىندىلادى، دەپ حابارلايدى قازاقپارات.

شىعارماشىلىق ۇجىم وتكەن كەزەڭدى جەمىستى اياقتاپ وتىر. ماۋسىم بويىنشا 7 پرەمەرا كورەرمەنگە جول تارتتى. تەاتردىڭ كوركەمدىك جەتەكشىسى، بەلگىلى تەاتر مامانى ءاليا بايماحاننىڭ ايتۋىنشا، بيىل رەپەرتۋاردا تىڭ تۋىندىلار كوبەيىپ، فارس، رەكۆيەم جانرلارىندا قويىلىمدار ساحنالاندى.

«بۇل جاڭا دەڭگەيگە شىققانىمىز. بىرنەشە ارىپتەسىمىز لايىقتى ماراپاتتار الىپ، توسبەلگى تاقتى. گاسترولدىك ساپارمەن وزبەكستانعا، تۇركىستان وبلىسىن ارالاپ قايتتىق. ەندى موڭعولياعا بارۋدى جوسپارلاپ وتىرمىز. «بوتاقارا-شەشەنبيكە» تاريحي دراماسىنىڭ پرەمەراسى بايان-ولگەي قالاسىندا وتەدى. بۇل دا ەلىمىزدىڭ مادەني ومىرىندەگى ەلەۋلى جاڭالىق بولماق. ەڭ باستىسى، وسى جىلى تەاتر جانىنان كامەرالىق حور اشىلدى»، - دەپ اتاپ ءوتتى ءاليا بايماحان.

جابىلۋ ماۋسىمىنا «ءانىم سەن ەدىڭ» (ءشامشى تۋرالى تامشىلار) سپەكتاكلى ۇسىنىلدى.

اتاقتى كومپوزيتوردىڭ شىعارماشىلىعىنا ارنالعان قويىلىمدى ارتىستەر وتە جوعارى دەڭگەيدە ويناپ شىقتى. سپەكتاكلدەن سوڭ كامەرالىق حور ءتۇرلى جانرداعى بىرنەشە تۋىندى ورىنداپ بەردى.

تەاتر ديرەكتورى سابىرالى كەمەلبايەۆ قويىلىمنىڭ رەجيسسەرىنە، جالپى ۇجىمعا العىسىن ءبىلدىردى.

ايتا كەتۋ كەرەك، قويىلىم قايىرىمدىلىق ماقساتتا ۇيىمداستىرىلدى. سپەكتاكلدەن تۇسكەن قاراجات تولىعىمەن ارىستاعى جارىلىستان زارداپ شەككەندەرگە كومەك رەتىندە جىبەرىلدى.