شانشۋ قادالعاندا نە ىستەۋ كەرەك؟

نۇر- سۇلتان. قازاقپارات - شانشۋ قادالۋ - جۇيكە تالشىعىنا سۋىق تيۋ دەگەن ءسوز. تەرلەپ وتىرىپ سىرتقا شىعىپ كەتۋ، جەل وتىندە تۇرىپ قالعان ادامداردا از ۋاقىتتىڭ ىشىندە شانشۋ جابىسا كەتەدى.

وسىعان سايكەس حالقىمىز «اۋرۋدا - شانشۋ جامان، سوزدە - قاڭقۋ جامان» دەپ ءدوپ تاۋىپ ايتقان. ال ەمشىلەرىمىز بارلىق اۋرۋ ءتورت سەبەپتەن: ىستىق، سۋىق، جەل، جەل- قۇزدان بولادى دەپ بولگەن. ەت پەن سۇيەكتىڭ، بۋىننىڭ اراسىنا جينالعان سۋىق ەڭ الدىمەن شانشىپ ادامعا بەلگى بەرەدى. وسى كەزەڭدە بىردەن سۋىقتى دەنەدەن شىعارۋعا ءمان بەرۋ قاجەت. سەبەبى ۇزاق ۋاقىتقا دەنەدە قالىپ قويعان سۋىق ادامنىڭ ەڭ ءالسىز دەنە مۇشەسىنىڭ ءبىرىن اۋرۋ ەتۋى مۇمكىن. ەندەشە شانشۋدى ۇيدە ەمدەۋدىڭ تاسىلدەرىمەن تانىسا وتىرىڭىزدار. شانشۋ قاتتى قادالعاندا ادام ءتىپتى دەم الا الماي قالادى. جاي عانا كۇندەلىكتى جاساپ جۇرگەن قاراپايىم ارەكەتتەردى ورىنداۋدىڭ ءوزى قيىنعا سوعىپ، ابدەن مازاسى قاشادى.

ارقا، بەل تۇسىندا باستالعان اۋرۋ سەزىمى قابىرعا استىنا، مىقىن، ساننىڭ ىشكى بەتىنە قاراي تارالادى. شانشۋدىڭ قاي تۇستان ۇزدىكسىز شانشىلعانىنا قاراي ادام بۇكىرەيىپ، ەڭكەيىپ نەمەسە ارتقا قاراي شالقايىپ قالادى. وتىرسا تۇرا الماي، تۇرسا وتىرا الماي قينالعان ناۋقاس تەز ارادا ەم شارالارىنا كىرىسۋ قاجەت. ءۇي جاعدايىندا جاسالاتىن ەم تۇرلەرى:

ارا بالى بال - سۋىقتى ەڭ جاقسى ءارى تەز كەتىرەدى. ونى ىستىق شايعا سالىپ ءىشۋ ارقىلى دەنەدەگى سۋىقتان ارىلۋعا بولادى. سونىمەن قاتار دەنەگە بالدى ءسىڭىرىپ جاعا وتىرىپ ماسساج جاساۋ ارقىلى تەز ساۋىعۋعا بولادى.

ليمون دەنەدەگى سۋىقتى شىعارۋ ءۇشىن ليمون قوسىپ ىشكەن شايدىڭ پايداسى زور. تەك ول ءۇشىن جىلى كيىم كيىپ، بويداعى سۋىقتى تەرلەۋ ارقىلى شىعارۋ قاجەت.

يود شانشۋ شانشىپ تۇرعان جەردى يودپەن تورلاۋ كەرەك. سونىمەن قاتار قويدىڭ مايىن جاعۋ ارقىلى دا دەرتتەن ايىعۋعا بولادى.

سپيرت اۋىرىپ تۇرعان جەرىڭىزدى 40 پروتسەنتتىك سپيرتپەن ءسۇرتىپ، سۇلگى قويىپ، جىلى جاتساڭىز وڭ ناتيجەسىن كورەسىز. لوڭقا (بانكا) قويۋ ارقاڭىزعا لوڭقا (بانكا) قوياتىن كورشىلەرىڭىز نەمەسە تۋىستارىڭىز بولسا ول دا ارتىق ەتپەيدى. ول اۋىرسىنۋدى باسىپ، قان جۇرگىزەدى جانە دەنەدەگى سۋىقتى الىپ، دەنە قۋاتىن ارتتىرادى.

شانشۋ ءجيى ۇستاپ اۋىراتىن ناۋقاستار وسى ەم تۇرىنە كوپ جۇگىنەدى. الايدا دەنەگە لوڭقا (بانكا) قويۋدىڭ وزىندىك ەمدىك تاسىلدەرى، ەرەجەسى بار. ماسەلەن، لوڭقا توڭكەرگەننەن كەيىن جۋىنۋعا جانە 10 مينۋتتان ارتىق ۋاقىت ۇستاۋعا بولمايدى. سونىمەن قاتار ءبىر جەرگە قايتالاپ قويۋ دا دەنساۋلىققا كەرى اسەر ەتەدى. سول سەبەپتى بۇل ەمنىڭ ءتۇرىن دارىگەرمەن كەڭەسە وتىرىپ جاساعان دۇرىس.

قىشا قاعازىن قويۋ (گورچيشنيك) قىشا قاعازىن قويۋ ارقىلى ەم جاساۋعا دا بولادى. تەك نۇسقاۋلىقپەن الدىمەن دۇرىستاپ تانىسۋ قاجەت. سونىمەن قاتار ءدارىحانالاردان قىزدىرعىش جاقپا مايلاردى الىپ نۇسقاۋلىق بويىنشا قولدانساڭىز دا ارتىق ەتپەيدى. وسى سەكىلدى ۇيدە ەمدەلەر بولساڭىز، بارىنشا وزىڭىزگە كۇتىم جاساپ، دەنەڭىزدى جىلى ۇستاڭىز. قايتا سۋىقتاپ قالماۋعا تىرىسىڭىز.

Massaget.kz