قورعانىس ءمينيسترى ارىستاعى جارىلىستىڭ ىقتيمال سەبەبىن اتادى

«ارىستا تاعى ەكى اسكەري ءبولىم بار، ولار قىزمەتىن جالعاستىرۋى مۇمكىن. ويتكەنى، ەشبىر قاۋىپ ءتوندىرىپ تۇرعان جوق جانە وندا وق- دارىلەر ساقتالمايدى. ەلباسى مەن پرەزيدەنتتىڭ تاپسىرماسى بويىنشا ەندى ارىستا وق- دارىلەر ساقتالمايدى. باسىم بولىگى قازىرگى تاڭدا جويىلدى. ال قالعانى قازاقستان اۋماعىنداعى باسقا قويمالارعا جەتكىزىلەدى. ارىس بۇل ارسەنالدان تولىعىمەن ارىلدى دەۋگە بولادى» ، - دەدى ق ر قورعانىس ءمينيسترى.

 ول سونداي- اق وق- دارىلەر قازاقستاننىڭ قاي وڭىرلەرىندە ساقتالاتىنىن اتاپ ءوتتى.

 «نورمالار قايتا قارالادى. ولار ەلدى مەكەندەردەن شالعاي ورنالاسقان جەردە ساقتالاتىن بولادى. جەرگىلىكتى اتقارۋشى باسقارمالارعا ەلدى مەكەندەر قويمالارعا جانە ارسەنالدارعا جاقىن بولماۋىن قاداعالاۋدى تاپسىرامىز» ، - دەدى مينيستر.

«قارۋ ساقتايتىن قويمانىڭ قۇرىلىسى كەزىندە قاشىقتىق نورماتيۆتەرى ساقتالادى. بۇل قويما (ارىستاعى - اۆت. ) 1930 -جىلى سالىنعان. ول كەزدە بۇل جەردە قالا بولماعان. اۋىل الىس جەردە ورنالاسقان. الايدا، سول ۋاقىتتان بەرى ەلدى مەكەن قارۋ ساقتايتىن قويمانىڭ قاقپاسىنا جاقىنداپ قالدى. بۇل دۇرىس ەمەس. ەندى مۇنداي بولمايدى» ، - دەدى ۆەدومستۆو باسشىسى.

ونىڭ ايتۋىنشا، قازىر جارىلىس سەبەبىن انىقتاۋ جانە تەرگەۋ جۇمىستارى ءجۇرىپ جاتىر. «بارلىق نۇسقالاردى قاراپ جاتىرمىز. ناقتى ايتۋ قيىن. دەگەنمەن، ءبىرىنشى كۇنى- اق مەن ءوزىم ءبولىم كومانديرىمەن جانە ارسەنال باستىعىمەن بىرگە قويمانىڭ ىشىنە كىردىك، بارلىق بەينەجازبالاردى الدىق. قازىر تەرگەۋ توبى بۇل جازبالاردى تەكسەرىپ جاتىر. تەرگەۋ جۇرگىزىلەدى. ءوز مىندەتتەرىن دۇرىس ورىنداماعان نەمەسە قاتەلىككە بوي الدىرعان لاۋازىمدى تۇلعالاردىڭ كىناسى انىقتالىپ، قاتاڭ جازاعا تارتىلادى. ءبىراق بۇگىنگى تاڭدا ەرەجەنى بۇزۋ سيپاتتارىن كورىپ وتىرعان جوقپىز» ، - دەپ ءتۇسىندىردى نۇرلان ەرمەكبايەۆ.

ءمينيستردىڭ اتاپ وتۋىنشە، ارىستاعى ارسەنال تەحنيكالىق تۇرعىدان ەڭ جاقسى جاراقتاندىرىلعان. «وقيعانىڭ سەبەبى ءارتۇرلى بولۋى مۇمكىن: ەلەكتر جەلىسىنىڭ تۇيىقتالۋى، جارىلعىش زاتتاعى حيميالىق رەاكتسيا، ديۆەرسيا، باسقا زاتتىڭ ءتۇسىپ كەتۋى، ءشوپتىڭ ورتەنۋى. نە دەگەنمەن، ارىستاعى ارسەنال تەحنيكالىق تۇرعىدان ەڭ جاقسى جاراقتاندىرىلعان ەدى. قاۋىپسىزدىك شارالارى قاتاڭ ساقتالدى. وتكەن جىلى جاڭا جۇيە، تەحنيكالىق قۇرىلعىلار، كۇزەتپەن قامتاماسىز ەتىلگەن. سىرتقى پەريمەترى مەن ارسەنالدىڭ ىشكى جاعدايىنا قاتىستى بارلىق اقپارات كەلىپ تۇسەتىن سەرۆەردى باسقارۋ پۋلتى بولدى. قويماعا كىرۋ شەكتەلگەن. ياعني، مۇندا بارلىق قاۋىپسىزدىك شارالارى ساقتالعان. سوڭعى بىرنەشە جىلدا قويمادان 30 مىڭ توننادان استام وق- ءدارى شىعارىلدى» ، - دەدى نۇرلان ەرمەكبايەۆ.

قورعانىس ءمينيسترى جۋرناليستەردىڭ سۇراقتارىنا جاۋاپ بەرە وتىرىپ، زالالدىڭ اۋقىمىن باعالادى. ونىڭ ايتۋىنشا، جارىلعان سناريادتار ارزان تۇرمايدى.