ارىس قالاسى ءبىر ايدا تولىعىمەن قالپىنا كەلتىرىلەدى - ۇكىمەت باسشىسى
ارىس. قازاقپارات - ارىس قالاسى 1 - تامىزعا دەيىن تولىعىمەن قالپىنا كەلتىرىلەدى. بۇل تۋرالى قالانى قالپىنا كەلتىرۋ بويىنشا وتكەن رەسپۋبليكالىق كوميسسيانىڭ وتىرىسىندا ۇكىمەت باسشىسى اسقار مامين ايتتى، دەپ حابارلايدى قازاقپارات.
جاعدايمەن تانىسۋ ءۇشىن ارىس قالاسىنا كەلگەن پرەمەر- مينيستر تۇركىستان وبلىسىنىڭ اكىمى ءومىرزاق شوكەيەۆپەن بىرگە سناريادتاردىڭ جارىلىسىنان قيراعان نىسانداردى ارالاپ كوردى. بۇل - تۇرعىن ۇيلەر، 4 قاباتتى اۋرۋحانا عيماراتى، حالىققا قىزمەت كورسەتۋ ورتالىعى جانە ي. جۋربا اتىنداعى مەكتەپ. ۇكىمەت باسشىسى سونداي- اق، ۇيلەرىنە ورالعان ارىستىقتارمەن كەزدەسىپ، ولارعا مەملەكەتتەن قاجەتتى بارلىق كومەك كورسەتىلەتىنىن اتاپ ءوتتى.
كەيىن ا. مامين حالىققا قولداۋ كورسەتۋ شارالارىن تالقىلاۋعا ارنالعان رەسپۋبليكالىق كوميسسيانىڭ وتىرىسىنا قاتىستى. ونىڭ سوزىنشە، تۇرعىنداردىڭ ءارقايسىسىنا 100 مىڭ تەڭگەدەن بەرىلەدى. سونداي- اق مينيسترلەر كابينەتىنىڭ باسشىسى قالا تولىعىمەن ءبىر ايدىڭ ىشىندە قالپىنا كەلتىرىلەتىنىن ءمالىم ەتتى. 
بۇدان بولەك، كاسىپكەرلەرگە 1 پايىزبەن 5 ميلليون تەڭگەگە دەيىن نەسيە بەرىلەدى. جاڭا اۋرۋحانا بوي كوتەرىپ، 4 مىڭ بالا جازعى لاگەرلەردە دەمالادى. ەڭ باستىسى، قالادا ورنالاسقان اسكەري ارسەنال الداعى ەكى اپتانىڭ ىشىندە باسقا جەرگە كوشىرىلەتىن بولادى.