پوليسيا ەرەۋىلشىلەرگە قارسى رەزەڭكە وق اتىپ، سۋ شاشتى
تبيليسي. قازاقپارات - گرۋزيا استاناسىنداعى ەرەۋىلدى باسۋ ءۇشىن پوليتسيا كوز جاساۋراتاتىن گاز، رەزەڭكە وقتار جانە سۋاتقىشتاردى قولداندى.
نارازىلىق شاراسىنا شىققاندار ۇكىمەت مۇشەلەرىنىڭ وتستاۆكاعا كەتۋىن تالاپ ەتىپ، پارلامەنت عيماراتىنا كىرمەك بولعان، دەپ حابارلايدى «قازاقپارات» CBB گە سىلتەمە جاساپ.
جاپپاي نارازىلىق بەيسەنبى، 20 - ماۋسىم كۇنى رەسەي دەلەگاتسياسىنىڭ تبيليسيدە وتكەن پراۆوسلاۆيە پارلامەنتارالىق باس اسسامبلەياسىنا قاتىسۋىنان كەيىن باستالدى. دەلەگاتسيانى باستاپ كەلگەن ر ف مەملەكەتتىك دۋماسىنىڭ دەپۋتاتى سەرگەي گاۆريلوۆتىڭ سەسسيا كەزىندە گرۋزيا پارلامەنتى سپيكەرىنىڭ كرەسلوسىنا وتىرىپ، جينالعاندارعا ورىس تىلىندە سويلەگەنى وپپوزيتسيانىڭ نارازىلىعىن تۋدىرعان. مۇنى قورلاۋ دەپ باعالاعان گرۋزيانىڭ وپپوزيتسيالىق دەپۋتاتتارى نارازىلىقتارىن ءبىلدىرىپ، باس اسسامبلەيانىڭ جۇمىسىن توقتاتتى.
فرانس پرەسس اگەنتتىگىنىڭ حابارلاۋىنشا، 10 مىڭعا جۋىق ادام پارلامەنت عيماراتىنىڭ الدىنا جينالىپ، پوليتسيانىڭ قۇرعان شەبىن جارىپ ءوتىپ، پارلامەنت سپيكەرى يراكلي كوباحيدزە جانە باسقا دا رەسمي تۇلعالاردىڭ وتستاۆكاعا كەتۋىن تالاپ ەتكەن. پوليتسيا شابۋىلدى تويتارىپ، جۇما كۇنى تاڭعا جۋىق رۋستاۆەلي داڭعىلىنا جينالعانداردىڭ باسىم بولىگىن تاراتقان.
CBB ءتىلشىسىنىڭ مالىمەتىنشە، ەرەۋىلشىلەردىڭ ءبىر بولىگى ءالى تاراعان جوق. ولار تبيليسي فيلارمونياسى عيماراتىنىڭ ماڭايىندا بارريكادا قۇرۋ ءۇشىن كوشەنى اۆتوبۋس، قوقىس جاشىكتەرىمەن جاۋىپ تاستاعان. دەنساۋلىق ساقتاۋ ءمينيسترى اكتسياعا قاتىسقانداردىڭ 14 ءى جانە 38 پوليسەيدىڭ جارالانعانىن حابارلادى. بۇرىنعى بيلەۋشى پارتيا «ءبىرتۇتاس ۇلتتىق قوزعالىستىڭ» ليدەرلەرىنىڭ ءبىرى، پارلامەنت دەپۋتاتى رومان گوتسيريدزە جۇماعا قاراعان ءتۇنى جۋرناليستەرگە جۇزدەن استام ازاماتتىڭ جاراقات العانىن مالىمدەگەن.
گرۋزيا ءى ءى م پوليتسيا پارلامەنت عيماراتىنا كىرمەك بولعانداردى توقتاتۋ ءۇشىن زاڭمەن بەلگىلەنگەن ارناۋلى قۇرالدار قولدانىلعانىن مالىمدەدى. گرۋزيا پرەمەر- ءمينيسترى مامۋكا باحتادزە بۇرىنعى پرەزيدەنت ميحايل سااكاشۆيلي نەگىزىن قالاعان وپپوزيتسيالىق «ءبىرتۇتاس ۇلتتىق قوزعالىس» پارتياسىن ەلدى قۇقىق اياسىنان شىعارماق بولدى دەپ ايىپتادى. 
«گرۋزيادا كەز كەلگەن ادامدار توبىنىڭ نارازىلىق ءبىلدىرۋ قۇقىعى بار. بۇل جولعى نارازىلىقتىڭ ءادىل بولعانىن تاعى قايتالايمىن. ءبىراق ءبىز باقىلاپ وتىرعان سوڭعى ەكى ساعات ىشىندە اگرەسسياشىل توپ، «ۇلتتىق قوزعالىس» گرۋزيانى ەلدە ماڭگىلىككە قۇرىلعان قۇقىقتىق ايادان شىعارۋ ءۇشىن كۇش قولدانىپ جاتىر» ، - دەدى باحتادزە.