قازاقستان بەنزيندى بەلارۋسكە قاشان ەكسپورتتاي باستايدى
«بەلارۋس پرەزيدەنتى الەكساندر لۋكاشەنكو وسىنداي ۇسىنىس جاسادى. راستايمىن. وسىنداي اڭگىمە بولدى. ءبىرىنشى ۆيتسە- پرەمەرلەرى كەلىپ، ءتيىستى ەكىجاقتى كەلىسسوزدەردى وتكىزدىك. قازىر جۇمىس توبى قۇرىلدى. بۇل ماسەلەنى تالقىلاپ جاتىرمىز. ەگەر كەلىسىمگە كەلسەك، 2-3 ايدىڭ ىشىندە مۇمكىن قازاقستان مەن بەلارۋستىڭ اراسىندا كەلىسىمشارت بولادى»، - دەدى ەنەرگەتيكا ءمينيسترى.
قانات بوزىمبايەۆ سونىمەن قاتار، قازاقستان بەنزين ەكسپورتىن ارتتىرسا، ەلىمىزدە بەنزين باعاسى قىمباتتاپ كەتپەي مە دەگەن سۇراققا دا جاۋاپ بەرە كەتتى. «ول بىزگە ەش زيانىن تيگىزبەيدى. ويتكەنى، ءوزىمىزدىڭ مۇنايىمىزدى فرانتسياعا قىتايعا، يتالياعا جەتكىزىپ ساتىپ وتىرمىز. بەلارۋس نەگە المايدى؟ مەن تۇسىنبەيمىن. ارامىزدا ءبىر عانا ماسەلە بار - ول كەدەندىك الىم. ءدال سونداي ماسەلە رەسەي مەن بەلارۋس اراسىندا دا بار. سونى ءبىز دۇرىستاپ شەشسەك، ەشقاندا پروبلەما بولمايدى»، - دەدى مينيستر.
ەسكە سالا كەتسەك، وسى جىلدىڭ مامىر ايىندا بەلارۋس پرەزيدەنتى الەكساندر لۋكاشەنكو قازاقستاندى مۇناي بويىنشا كەلىسسوزدەردى جانداندىرۋعا شاقىرعان بولاتىن.
«قازىرگى ۋاقىتتا ءبىز كومىرسۋتەك شيكىزاتىن تاسىمالداۋدى ارتاراپتاندىرۋمەن اينالىسىپ جاتقانىمىزدى بىلەتىن بولارسىزدار. بىزدە بىرنەشە نۇسقا بار. بەلارۋس باسقا جەردەن دە مۇناي تاسىمالداۋ باعىتىندا كەلىسسوزدەر جۇرگىزۋ ۇستىندە. بيىل مۇناي وڭدەيتىن زاۋىتتاردى جاڭعىرتۋ جۇمىسىن اياقتايمىز. سول سەبەپتى، بىزگە الەمدىك نارىقتان مۇنايدى ساتىپ الۋ جەڭىلدەي تۇسەدى. بۇل باعىتتاعى كەلىسسوزدەردى باستاپ كەتتىك تە. ەندى بەلارۋسقا قازاقستاندىق مۇنايدى جەتكىزۋ بويىنشا كەلىسسوزدەر جاندانسا دەيمىز»، - دەگەن ەدى الەكساندر لۋكاشەنكو.