قاسىم-جومارت توقايەۆتى فرانسيا، جاپونيا ەلدەرىنىڭ پرەزيدەنتتەرى قۇتتىقتادى
قاسىم-جومارت توقايەۆتىڭ اتىنا قازاقستان پرەزيدەنتى بولىپ سايلانۋىنا وراي قۇتتىقتاۋ حاتتارى مەن جەدەلحاتتار كەلىپ جاتىر.
فرانسيا پرەزيدەنتى ەممانۋەل ماكرون قاسىم-جومارت توقايەۆتى قازاقستان رەسپۋبليكاسىنىڭ پرەزيدەنتى بولىپ سايلانۋىمەن قۇتتىقتاپ، تابىس تىلەدى. سونداي-اق ول الداعى ۋاقىتتا كەزدەسۋگە، ەكى ەل اراسىنداعى قارىم-قاتىناستاردىڭ پەرسپەكتيۆالارى مەن ودان ءارى دامىتۋ ماسەلەلەرىن تالقىلاۋعا ءازىر ەكەنىن جەتكىزدى.
«فرانسيا اراداعى قارىم-قاتىناستاردىڭ ىلگەرى دامۋىنا ەرەكشە مۇددەلى. ءبىز تۇڭعىش پرەزيدەنت نۇرسۇلتان نازاربايەۆ مىرزامەن بريۋسسەلدەگى كەزدەسۋىمىزدە ىنتىماقتاستىقتىڭ ەكونوميكالىق سالاداعى ءۇش باسىم باعىتىنا توقتالدىق. ولار: اۋىل شارۋاشىلىعى جانە اگروونەركاسىپتىك كەشەن، جاڭارتىلاتىن ەنەرگيا كوزدەرى جانە سيفرلىق سالا. مادەنيەت، ءبىلىم، لينگۆيستيكالىق جانە مادەني-گۋمانيتارلىق سالالار بويىنشا قارقىندى دامىپ كەلەدى. وسى بىرلەسكەن جۇمىسىمىز قازاقستاننىڭ گۇلدەنۋىنە ءوز ۇلەسىن قوسادى»، - دەلىنگەن جەدەلحاتتا.
جاپونيانىڭ پرەمەر-ءمينيسترى سيندزو ابە قۇتتىقتاۋ جەدەلحاتىندا ەكى ەل اراسىنداعى جوعارى بايلانىستاردى اتاپ وتكەن.
«الداعى ۋاقىتتا سىزبەن ساياسي، ەكونوميكالىق، مادەني جانە باسقا دا سالالارداعى ىنتىماقتاستىعىمىز بەن ءوزارا دوستىق قاتىناسىمىزدى جالعاستىرا بەرۋدى قالايمىن»، - دەپ جازدى سيندزو ابە.
يسپانيانىڭ كورولى فەليپە ءوزىنىڭ قۇتتىقتاۋىندا قازاقستان پرەزيدەنتىمەن جاقىن ارادا كەزدەسەتىنىنە سەنىم ءبىلدىردى.
«ءبىزدىڭ مەملەكەتتەرىمىزدى بىرىكتىرەتىن بارلىق سالا بويىنشا ىنتىماقتاستىعىمىزدىڭ الداعى ۋاقىتتا دا نىعايا بەرەتىنىنە سەنىمدى بولىڭىز. بۇل تەرەڭ بايلانىستارىمىز حالىقتارىمىزدىڭ بەيبىتشىلىك پەن تۇراقتىلىق قاعيداتتارىنا دەگەن ادالدىعىنا نەگىزدەلگەن»، - دەلىنگەن جەدەلحاتتا.
پولشا رەسپۋبليكاسىنىڭ پرەزيدەنتى اندجەي دۋدا ءوزىنىڭ قۇتتىقتاۋىندا قازاقستاندى ورتالىق ازياداعى ەڭ ماڭىزدى ارىپتەس رەتىندە اتاپ ءوتتى.
«پولشا- قازاقستان اراسىنداعى بايلانىستار الداعى جىلدارى دا ساياسي ءارى ەكونوميكالىق سالالاردا قارقىندى دامۋىن جالعاستىرا بەرەتىنىنە ءۇمىت ارتامىن. ءبىزدىڭ قارىم-قاتىناستارىمىزدىڭ الەۋەتى جوعارى ەكەنىنە سەنىمدىمىن»، - دەپ اتاپ ءوتتى اندجەي دۋدا.
فينليانديا رەسپۋبليكاسىنىڭ پرەزيدەنتى ساۋلي نيينيستە دا قاسىم-جومارت توقايەۆتى قۇتتىقتاپ، تىعىز ىنتىماقتاستىققا دايىن ەكەنىن بىلدىرگەن.
«قازاقستان مەن فينليانديانىڭ قارىم-قاتىناسى وتە جاقسى، اسىرەسە، ساۋدا سالاسىنداعى بايلانىستارعا ەرەكشە ءمان بەرىلگەن. ءبىز بۇدان ءارى قاراي دا ەكىجاقتى جانە حالىقارالىق كۇن تارتىبىندە ءوزارا ءىس-قيمىلدارىمىزدى ارتتىرا بەرۋگە دايىنبىز»، - دەلىنگەن جەدەلحاتتا.
ەۋروپالىق كوميسسيا پرەزيدەنتى جان-كلود يۋنكەر قۇتتىقتاۋ جەدەلحاتىندا ەۋروكوميسسيانىڭ قازاقستانمەن ىنتىماقتاستىقتى نىعايتا تۇسۋگە بەيىلدى ەكەنىن اتاپ وتكەن.
«اۋقىمدى ارىپتەستىك پەن ىنتىماقتاستىقتى قامتاماسىز ەتۋ ءبىزدىڭ كوپ قىرلى قارىم-قاتىناستارىمىزدى، سونىڭ ىشىندە ەكونوميكالىق بايلانىستارىمىزدى ودان ءارى دامىتۋ ءۇشىن پلاتفورما بولادى»، - دەلىنگەن جەدەلحاتتا.
سونداي-اق، قۇتتىقتاۋ حاتتارىن ە ق ى ۇ از ۇلتتار ءىسى بويىنشا جوعارى كوميسسارى لامبەرتو زانەر، مالايزيا كورولى سۇلتان ابدۋللا رياتۋددين ءال-مۇستافا بيللاح، ۆەتنام سوتسياليستىك رەسپۋبليكاسىنىڭ پرەزيدەنتى نگۋەن فۋ چونگ، تايلاند پرەمەر-ءمينيسترى، گەنەرال پرايۋت چان-وچا، كيپر پرەزيدەنتى نيكوس اناستاسياديس، تۇرىك رەسپۋبليكاسىنىڭ ۇلى ۇلتتىق ءماجىلىسىنىڭ ءتوراعاسى مۇستافا شەنتوپ، كاۆكاز مۇسىلماندارى باسقارماسىنىڭ ءتوراعاسى، ت م د ءدىنارالىق كەڭەسىنىڭ تەڭتوراعاسى شەيح-ۋل-يسلام اللاحشۇكىر پاشا-زادە، ارمەنيا جوعارى پاتريارحى جانە بارشا ارمىنداردىڭ كاتاليكوسى گارەگين Ⅱ جولدادى.
