قازاقستاندا قىتايتانۋ ينستيتۋتى اشىلدى
اتالعان ينستيتۋتتىڭ باسشىسى بولىپ بەلگىلى قىتايتانۋشى، فيلولوگيا عىلىمدارىنىڭ دوكتورى، اقىن، دۇنيەجۇزى سينولوگتار قوعامىنىڭ مۇشەسى دۇكەن ءماسىمحان ۇلى تاعايىندالدى.
«قىتاي تانۋ ينستيتۋتىنىڭ نەگىزگى ماقساتى - قازاقستان رەسپۋبليكاسىمەن ديپلوماتيالىق قارىم-قاتىناس ورناتقان ستراتەگيالىق ارىپتەس ەل - قىتاي حالىق رەسپۋبليكاسىنىڭ تاريحىن، مادەنيەتىن، سالت-ءداستۇرىن، ەكونوميكالىق-الەۋمەتتىك دامۋ ەرەكشەلىگىن، الەمدەگى ورنىن زەردەلەپ، عىلىمي بايىپتاۋ. رەسمي بەيجىڭنىڭ شىعىس جانە وڭتۇستىك ازيا، تايۆان، باتىس ەۋروپا، تۇركى، يسلام دۇنيەسى، ورتالىق ازيا ەلدەرىمەن قارىم-قاتىناسىن ساراپتاۋ»، دەلىنگەن حابارلامادا.
ينستيتۋت ق ح ر- دىڭ ءوز ىشىندەگى ەتنوسارالىق، ءدىنارالىق، ەكونوميكالىق، الەۋمەتتىك، ساياسي ماسەلەلەردى، بۇگىنگى قالپى مەن بەتالىسىن بولجامداپ، اقپارات كوزدەرى مەن جالپى وقىرمانعا انىق ەتىپ جەتكىزبەك.
سونىمەن قاتار ينستيتۋتتىڭ مادەني باعىتتاعى جوسپارلاعان جۇمىستارى بار. مىسالى، قىتاي مۇراعاتتارىنداعى ەجەلگى تۇركى، قازاق تايپالارى تاريحى مەن مادەنيەتىنە قاتىستى دەرەكتەردى ىزدەۋ، جيناۋ، جۇيەلەۋ جانە باسىپ شىعارۋ.
«ايگىلى قىتاي عالىمدارى جازعان ەجەلگى تۇركى، بايىرعى قازاق تاريحى مەن مادەنيەتى تۋرالى زەرتتەۋلەردى، قىتاي (حانزۋ) ۇلتىنىڭ تۇسىنىك-تانىمىن، تالعام-پاراساتىن قازاقستان جۇرتشىلىعىنا كەڭىنەن تانىستىرۋ. قىتاي ادەبيەتى ۇلگىلەرىن قازاق تىلىنە اۋدارۋ. ەكى جاقتىڭ مادەني-رۋحاني، عىلىمي-زەرتتەۋشىلىك قارىم-قاتىناسىنا لايىقتى جاعداي تۋعىزۋ»، دەلىنگەن حابارلامادا.
