ساراپشى: قاسىم-جومارت توقايەۆقا ساياساتكەر رەتىندە قوعامدىق ماندات بەرىلىپ وتىر

«كەشە تۇنگى ون ەكىدە Еxit poll-دىڭ مالىمدەمەسىن كوردىك. سول مالىمدەمەگە قاراعاندا توقايەۆ قاسىم- جومارت كەمەل ۇلىنىڭ باسىم پايىزبەن، كوپ داۋىسپەن پرەزيدەنتتىك سايلاۋدا جەڭىسكە جەتكەن سىڭايى بار. بۇگىنگى ورتالىق سايلاۋ كوميسسياسىنىڭ رەسمي مالىمدەمەسىندە ۇلكەن ايىرماشىلىق بولمايدى دەپ ەسەپتەيمىن. قاسىم-جومارت توقايەۆتىڭ وسى سايلاۋدا جەڭىسكە جەتۋى - مەنىڭشە، وبەكتيۆتى ماسەلە. سەبەبى، ونىڭ ارتىندا قازاقستانداعى ەڭ ۇلكەن ءارى ەڭ ىقپالدى ەلەكتوراتى، نۇرسۇلتان نازاربايەۆ جەتەكشىلىك ەتەتىن «Nur Otan» پارتياسى تۇر. سوندىقتان، قاسىم-جومارت توقايەۆتىڭ ۇلكەن ەلەكتوراتى ءوزىنىڭ كانديداتىنا داۋىس بەردى دەپ ەسەپتەيمىن»، - دەدى ساراپشى ەلوردادا تىلشىلەرگە بەرگەن سۇحباتىندا.

ءانۋار شوتباي قاسىم-جومارت توقايەۆتىڭ ەڭ بەدەلدى دە تاجىريبەلى، ىقپالدى ساياساتكەرلەردىڭ ءبىرى ەكەنىن اتاپ ءوتتى.

«ءبىز بۇگىن كورەتىن سايلاۋ قورىتىندىسىن توقايەۆقا ساياساتكەر رەتىندە بەرىلگەن قوعامدىق ماندات دەپ ەسەپتەۋگە تولىق نەگىز بار. جالپى، وسى سايلاۋ ناۋقانىندا ۇمىتكەرلەردىڭ شتابتارى قالاي جۇمىستى جۇرگىزگەنىنە ءبارىمىز كۋامىز. وسى ناۋقان اياسىندا ەڭ بەلسەندى، ەڭ قىزىقتى سايلاۋ ناۋقانىن ۇيىمداستىرا بىلگەنى - توقايەۆتىڭ شتابى ەكەنى بارشاعا ايان. نەگە دەسەڭىزدەر، الەۋمەتتىك جەلىلەردە، اۋىلدار مەن اۋدانداردا، وبلىستار مەن قالالاردا، ج و و-لاردا كوپپەن كەزدەسىپ، الەۋمەتتىك توپتاردى تولىق قامتىعان مەنىڭشە، قاسىم-جومارت توقايەۆتىڭ شتابى عانا. سول سەبەپتى، وسى سايلاۋ ناۋقانىندا باسىم داۋىسپەن جەڭىسكە جەتسە - ول وبەكتيۆتى ماسەلە»، - دەدى ساراپشى.

ايتا كەتكەن ءجون، Еxit poll ناتيجەسى بويىنشا 9 -ماۋسىمدا وتكەن ق ر پرەزيدەنتىنىڭ كەزەكتەن تىس سايلاۋى بارىسىندا سايلاۋشىلاردىڭ 70,13 پروتسەنتى كانديدات قاسىم-جومارت توقايەۆقا داۋىس بەرگەن ەدى.

ەسكە سالا كەتسەك، كەشە قازاقستان پرەزيدەنتىن كەزەكتەن تىس سايلاۋى ءوتتى.

ق ر پرەزيدەنتىنىڭ كەزەكتەن تىس سايلاۋىندا ەل ىشىندە جانە شەت ەلدەردە 9968 داۋىس بەرۋ ۋچاسكەسى جۇمىس ىستەدى. سايلاۋ تۋرالى كونستيتۋتسيالىق زاڭعا سايكەس، داۋىس بەرۋ ۋاقىتى ستاندارتتى (ساعات 7.00-20.00 ارالىعى) بولدى.