لوندوندا قازاقستاندىق ديزاينەردىڭ ءساندى كيىمدەر جيىنتىعى كورسەتىلدى
بۇگىندە الەمدىك ديزاينەرلەردىڭ نازارى ەتيكالىق سانگە اۋعان. ياعني قورشاعان ورتانىڭ لاستانباۋىنا باسى قاتقان سانگەرلەر تابيعي تازا ماتەريالداردان جاسالعان كيىمدەرگە باسىمدىق بەرەدى. قازاقستاندىق الما فارمەر بولسا، بۇل جايلى ەكى مىڭىنشى جىلداردىڭ باسىندا- اق ويلانىپ قويعان.
الما فارمەر، ديزاينەر:
- بۇكىل الەمدىك بانكتە جوبالار بويىنشا كەڭەسشى بولىپ جۇمىس ىستەگەن ۋاقىتىمدا شاعىن ءبىر اۋىلدا جىلىتىلمايتىن باراكقا كىرگەنىم بار. سالقىن جەردە ايەلدەر كيىزدەن كيىم تىگىپ وتىردى. سول كەزدە ولارعا بارىنشا جاردەم بەرۋىمىز قاجەت دەپ ويلادىم.
الما قازىر بانك سالاسىندا قىزمەت ەتپەيدى. شىعارماشىلىققا دەن قويعان. لوندوندا تۇراقتاعانىنا 20 جىلدان استى. بريتانيالىقپەن شاڭىراق قۇرسا دا، قازاقستاندىق ازاماتتىعىن وزگەرتپەگەن الما ۇلى دالا ەلىنىڭ مادەنيەتىن بارىنشا پاش ەتىپ ءجۇر.
ەلۆين باتلەر، كورەرمەن:
- المانىڭ ديزاينەرلىك كيىمدەرىنىڭ ءبىرىن جۇبايىما الىپ بەرگىم كەلەدى. ويتكەنى ساپاسى وتە جاقسى، ماتەريالى ادەمى، تۇستەرى تاماشا. بۇل دۇنيەلەر مەنىڭ ايەلىم سياقتى سونداي ادەمى.
ءسان كورسەتىلىمى جىل سايىن ۇيىمداستىرىلاتىن رومفورد كينوفەستيۆالى اياسىندا ءوتتى. قازاقستاننان بولەك بيىل بەلارۋس جانە وزبەكستاننىڭ ديزاينەرلەرى بەلسەندىلىك تانىتتى. شاراپاتى مول شارا بيىل 45 مىڭ ادام كەلەتىن ساۋدا ورتالىعىندا وتەدى دەپ بەكىتىلگەن. سايكەسىنشە كەلۋشىلەر فەشن- شوۋدى تاماشالاپ، بىرەگەي كوڭىل كۇيگە بولەندى.
ناتالي بەيس، ۇيىمداستىرۋشى:
- ءبىز شارالارىمىزدىڭ وزگەلەردەن ەرەكشەلەنگەنىن قالايمىز. ساتىپ الۋشىلار ساۋدا جاساپ قانا قويماي، ءبىر ءسات توقتاپ، جاڭا نارسەلەرگە قىزىعۋشىلىقتارى ارتسا دەگەن نيەتىمىز بار. فەستيۆال اياسىندا سۋرەت كورمەسى دە ۇيىمداستىرىلدى. وزگەلەرمەن يىق تىرەسىپ، قازاقستاندىق سۋرەتشىلەر دە ءوز ەڭبەكتەرىن كورەرمەن نازارىنا ۇسىندى. بريتانيالىقتار مەن الەمنىڭ تۇكپىر- تۇكپىرىنەن كەلگەن تۋريستەر ولاردىڭ ونەرىنە ءتانتى بولدى.
