باس پروكۋراتۋرا رۇقسات ەتىلمەگەن ميتينگىگە شىققاندارعا جاۋاپكەرشىلىك قاراستىرىلعانىن ەسكەرتتى

نۇر- سۇلتان. قازاقپارات - ق ر باس پروكۋرورىنىڭ ورىنباسارى بولات دەمبايەۆ رۇقسات ەتىلمەگەن اكسيالارعا شاقىرعانى، ۇيىمداستىرعانى، قاتىسقانى ءۇشىن جاۋاپكەرشىلىك قاراستىرىلعانىن ەسكەرتتى، دەپ حابارلايدى قازاقپارات.

«الەۋمەتتىك جەلىلەردە 9 جانە 10 - ماۋسىمدا رۇقسات ەتىلمەگەن ميتينگىلەردى ۇيىمداستىرۋعا جانە ولارعا قاتىسۋعا شاقىرۋلار تاراتىلۋدا»، دەلىنگەن ق ر باس پروكۋرورىنىڭ ورىنباسارى بولات دەمبايەۆتىڭ «پروكۋراتۋرا تۋرالى» زاڭنىڭ 31-بابى تارتىبىندە ۇندەۋىندە.

ول قوعامدىق ءتارتىپتى، تۇرعىنداردىڭ ءومىرى مەن دەنساۋلىقتارىنىڭ قاۋىپسىزدىگىن قامتاماسىز ەتۋ ماقساتىندا زاڭنىڭ نورمالارىنا نازار اۋداردى.

«ميتينگىلەردى ۇيىمداستىرۋ جانە وتكىزۋ ءتارتىبى «قازاقستان رەسپۋبليكاسىندا بەيبىت جينالىستار، ميتينگىلەر، شەرۋلەر، پيكەتتەر جانە دەمونستراتسيالار ۇيىمداستىرۋ مەن وتكىزۋ ءتارتىبى تۋرالى» قازاقستان رەسپۋبليكاسىنىڭ زاڭىمەن رەتتەلەدى.

مۇنداي جاريا ءىس- شارالار جەرگىلىكتى اتقارۋشى ورگانداردى الدىن الا حاباردار ەتۋمەن ولاردان رۇقسات الۋ ارقىلى ارنايى بەلگىلەنگەن ورىنداردا، تۇرعىنداردىڭ تىنىس- تىرشىلىگىن قامتاماسىز ەتۋ وبەكتىلەرىنىڭ قالىپتى جۇمىس ىستەۋىنە كەدەرگى كەلتىرەتىن جاعدايلاردى بولدىرماۋ شارالارىن قولدانا وتىرىپ جۇرگىزىلۋى ءتيىس.

رۇقسات ەتىلمەگەن اكسيالارعا شاقىرعانى، ۇيىمداستىرعانى، قاتىسقانى ءۇشىن اكىمشىلىك قۇقىق بۇزۋشىلىق تۋرالى كودەكستىڭ 488-بابى بويىنشا جاۋاپتىلىق تۋىندايدى»، دەلىنگەن حابارلامادا.

ونىڭ ايتۋىنشا، بۇل ارەكەتتەر ەلەۋلى زالال كەلتىرسە، وندا كىنالىلەر قىلمىستىق كودەكستىڭ 400-بابى بويىنشا جاۋاپتىلىققا تارتىلادى.

 «باس پروكۋراتۋرا ازاماتتاردى زاڭدى مۇلتىكسىز ساقتاۋعا، ارانداتۋشىلىققا بەرىلمەۋگە جانە زاڭسىز اكسيالارعا قاتىسۋدان باس تارتۋعا قايتادان شاقىرادى»، دەلىنگەن حابارلامادا.