الماتىدا ەتنوفەستيۆال: مىڭداعان ادام جينالدى
الاتاۋدىڭ باۋرايىنداعى «بورالداي ساق قورعاندارى» ارحەولوگيالىق پاركىندە «ۇلى دالا - كوشپەندىلەر الەمى» ەتنوفەستيۆالىندە الەمنىڭ 18 ەلىنەن 140 ادام كەلدى.
ەتنوفەستيۆالدى تاماشالاۋعا كەلگەن تۋريستەرگە ارناپ ەتنواۋىل، ۇلتتىق سپورتتىق ويىندار، ساداقشىلار، قولونەرشىلەر، ۇستالار، بۇركىتشىلەر، اڭشىلارعا ارنايى الاڭدار تىگىلدى.
سونداي- اق، كەلۋشىلەرگە ۇلتتىق تاعام قويىلعان داستارحان جايىلدى.
كوشپەندىلەر مەرەكەسىنە ماجارستان، ازەربايجان، موڭعوليا، ۋكراينا، بۋرياتيا، ساحا رەسپۋبليكاسىنان، داعىستاننان ادامدار كەلدى.
ۇيىمداستىرۋشىلار 7-8 -ماۋسىم ارالىعىندا ون مىڭداي ادامدى كۇتىپ الۋعا ءازىر ەكەندىكتەرىن جەتكىزدى.
انتروپولوگ اندراش بيرو باستاعان ماجارستاننان كەلگەن ەتنوتۋريستەر ات ويىندارىنا بەلسەنە قاتىستى. باشقۇرتستاننان كەلگەن ساداقشىلار ات ۇستىندە ءارى جاياۋ مەرگەندىك قابىلەتتەرىن سىنادى.
الماتى اكىمى باۋىرجان بايبەك تە ساداق اتىپ كوردى. قىرعىز ەلىنەن كەلگەن «سالبۋۋرۋن» كومانداسى اتبەگىلىك، قۇسبەگىلىك، اڭشىلىق قاسيەتتەرىن كورسەتەتىن بولدى.
«ەتنوفەستيۆالدە كوشپەندىلەر زامانىنداعى مۋزىكا مەن سپورتتىق سايىستار سالتانات قۇرماق. باستى ماقسات - كوشپەندىلەر زامانىنىڭ تاريحىن وسكەلەڭ ۇرپاقتىڭ ساناسىنا ءسىڭىرۋ» ، - دەدى قالالىق مادەنيەت باسقارماسىنىڭ باسشىسى نۇرلان سىدىقوۆ.
ەتنوفەستيۆال اياسىندا زاماناۋي ونەر كورمەلەرى، «تۇران» ەتنوفولكلورلىق ءانسامبلى، «حاسساق» ۇجىمى، تۇركيا، موڭعوليا، التاي، تىۆا، چۋۆاشيا، قىرعىز ەلىنەن كەلگەن انشىلەر ونەر كورسەتەدى.
سونىمەن قاتار، الىپتار شوۋى جوسپارلانعان. قازاقستاننىڭ 7 دۇركىن چەمپيونى، الەمنىڭ 2 دۇركىن چەمپيونى، گيننەستىڭ رەكوردتار كىتابىنا ەنگەن سەرگەي تسىرۋلنيكوۆ باستاعان كۇشتىلەر ونەر كورسەتەدى.
كەلۋشىلەرگە ىڭعايلى بولۋ ءۇشىن قالانىڭ 4 جەرىنەن اباي مەن ا. بايتۇرسىنوۆ قيىلىسىنان، شالياپين كوشەسىندەگى 22 ءۇيدىڭ جانىنان، الاتاۋ ءداستۇرلى ونەر تەاترىنان، الماتى-1 تەمىرجول
ۆوكزالىنان ارنايى اۆتوبۋستار شىعارىلدى. بورالداي ساق قورعاندارىنا جەتۋ قۇنى - 150 تەڭگە.
