رەسەيدەگى ومبىدا استاۋ جاسايتىن العاشقى قازاق شەبەرحاناسى اشىلدى

نۇر-سۇلتان. قازاقپارات - رەسەيدەگى «قازاق مادەنيەتىنىڭ ءسىبىر ورتالىعىنىڭ» مۇشەسى اسكەربەك بوگۋمبايەۆ رەسەي فەدەراتسياسىنىڭ ومبى قالاسىندا قازاقى ۇلگىدەگى استاۋ شىعاراتىن شەبەرحانا اشتى.

بۇل تۋرالى «وتانداستار قورى» ا ق باسپا ءسوز قىزمەتىنەن حابارلاندى.

اسكەربەك بوگۋمبايەۆ 2018 -جىلى «وتاناستار قورىنىڭ» قولداۋىمەن ۇيىمداستىرىلعان كىشى قۇرىلتايعا قاتىسقان بولاتىن. قازاقى استاۋلار شىعارۋ تۋرالى يدەيا سول قۇرىلتايدا كەلگەن ەكەن.

«وسى قۇرىلتايدا توعايباي نۇرمۇرات ۇلىمەن تانىستىم. توعايباي اعا مەنى ءوزىنىڭ ەنەرگەتيكاسىمەن تاڭ قالدىردى. ءبىز پىكىر الماسا كەلە، ويلارىمىز بەن ماقساتتارىمىزدىڭ بىردەي ەكەنىن تۇسىندىك. باستىسى - ءبىزدىڭ قازاق مادەنيەتىمىزدىڭ دامۋى، ءبىزدىڭ داستۇرلەرىمىزدى ساقتاپ قالۋ. ءبىز سونداي-اق حالىقتىق قولدانبالى قولونەرىنىڭ دامۋىنا، اسىرەسە استاۋ وندىرۋگە ەرەكشە توقتالدىق. توعايباي اعا ماعان استاۋ وندىرىسىنە ارنالعان شەبەرحانانى اشۋدى جانە بۇل جۇمىستى ۇيىمداستىرۋعا كومەكتەسەتىنىن جەتكىزدى. قۇرىلتاي اياقتالدى، مەن جاڭا تانىسسىممەن قوشتاستىم، ءبىراق بۇل سوڭعى كەزدەسۋ بولمايتىنىن ءتۇسىندىم. ال مىنە ۋاقىت كەلە مەن رەسەيدەگى «استاۋ» ءوندىرىسى شەبەرحاناسىنىڭ جەتەكشىسىمىن!»، - دەيدى اسكەر بوگۋمبايەۆ.

اسكەربەك بوگۋمبايەۆ ومبى قالاسىندا «استاۋ» ونىمدەرىن وندىرۋگە ارنالعان شەبەرحانانىڭ اشىلۋىنا جاردەمدەسكەن «جۋسان» حالىقارالىق كاسىپكەرلەر قاۋىمداستىعىنىڭ ءتوراعاسى رىسبەك توعايبايعا جانە «وتانداستار قورى» ك ە ا ق-نا العىسىن بىلدىرەدى.