شىڭعىس ايتماتوۆتىڭ «ارمانىم اسەلىم» حيكاياسى ساحنالاندى
كلاسسيك جازۋشىنىڭ ايگىلى حيكاياسىن قازاقستاننىڭ حالىق ءارتىسى، ش. ايتماتوۆ اتىنداعى حالىقارالىق سىيلىقتىڭ لاۋرەاتى تالعات تەمەنوۆ ساحنالادى.
اتالمىش تۋىندى بۇدان جارتى عاسىردان استام ۋاقىت بۇرىن ع. مۇسىرەپوۆ اتىنداعى جاسوسپىرىمدەر مەن بالالار تەاترىندا كورىنگەن ەدى. مىنە، وسى شىعارمانى تالعات تەمەنوۆ بۇگىنگى كۇنگە لايىقتاپ «قىزىل ورامالدى شىنارىم» دەگەن اتپەن قايتا قويعان بولاتىن.
بۇل جولى باتىس قازاقستاندىق كورەرمەندەرگە سىيعا تارتىلعان ليريكالىق دراما بارىسىندا جول بويىندا تانىسقان اسەل مەن كولىك جۇرگىزۋشىسى ءىلياس ءبىر-بىرىنە عاشىق بولىپ قالادى. اقىرى اسەل اتا-اناسىنىڭ رۇقساتىن الماستان، اتاستىرىلعان جىگىتىنە دە قاراماي، ءىلياسقا ەرىپ كەتە بارادى. ايتسە دە اراعا قاديشا ءتۇسىپ، ءىلياس ىشكىلىككە سالىنادى. مۇنى بىلگەن اسەل كىشكەنتاي ساماتىن قولىنا ۇستاپ، جولعا شىققاندا، ەگدە جۇرگىزۋشى بايتەمىرگە كەزىگەدى. كەزىندە تاۋ كوشكىنىنىڭ كەسىرىنەن ايەلى مەن قوس بالاسىنان ايىرىلعان مەيىرىمدى بايتەمىر اسەل مەن ۇلىن ۇيىنە پانالاتادى. اقىرى ءبىر جىلدان كەيىن ەكەۋى ۇيلەنىپ تىنادى. ءوزىن جاقسى كورگەن قاديشامەن قوش ايتىسقان ءىلياس كەزدەيسوق بايتەمىردىڭ ۇيىنە تاپ بولادى. الايدا ءبارى دە كەش ەدى. سپەكتاكل كورەرمەندەرگە ماحابباتتى باعالاۋ كەرەكتىگىن ۇقتىرادى.
ءىلياستى جاسقايرات ۆاليۋلليەۆ، اسەلدى جاڭا ەسىم نۇرجيان حاسانوۆا سومدادى. سونداي-اق تەاتردىڭ بەلدى ارتىستەرى نارگيز شادىيەۆا، مۇساعالي بەكتەنوۆ، گۇلجيان شىنتەمىرلەر دە ءوز رولدەرىن الىپ شىقتى.
«ۇلى جازۋشىنىڭ كلاسسيكالىق تۋىندىسىن كەزىندە جاستانىپ وقىدىق. ساحنالانعانىن، وندا كەيىنگىگە اڭىز بولعان ونەر تارلاندارىنىڭ ويناعانىن كوردىك. بۇگىن، مىنە، سول شىعارمانىڭ ورالدا قويىلۋى تەگىن ەمەس. تۋعان جەرگە تاعزىم دەگەن بار. سوناۋ نارىن قۇمىندا اتا-باباسىنىڭ كىندىك قانى تامعان، قازىر قاليبەك قۋانىشبايەۆ اتىنداعى تەاتردا ماڭداي تەرىن سىپىرىپ، ەڭبەك ەتىپ جۇرگەن تالعات تەمەنوۆتىڭ بۇل وسى ەلىنە جاساعان تارتۋى دەپ بىلەمىز. ءىلياس رولىندە ويناعان جاسقايراتقا قاتتى ريزا بولدىم. وسىنداي تالانتتى جاستارىمىز كوبەيە بەرسىن. اسەل - نۇرجيان ءالى جاس، بولاشاعى الدا دەپ ويلايمىن»، دەدى پرەمەراعا قاتىسقان اقىن، مەملەكەتتىك سىيلىقتىڭ لاۋرەاتى اقۇشتاپ باقتىگەرەيەۆا.
تالعات تەمەنوۆ تە جاسقايرات ۆاليۋلليەۆپەن بىرگە نۇرجيان حاسانوۆانىڭ تىرناقالدى ونەرىن اتاپ ءوتىپ، جاس دارىننىڭ ءالى دە ستۋدەنت ەكەندىگىن جەتكىزدى.
سپەكتاكل سوڭىندا ح. بوكەيەۆا اتىنداعى باتىس قازاقستان وبلىستىق قازاق دراما تەاترىنىڭ ءبىر توپ قىزمەتكەرىنە «مادەنيەت مايتالمانى»، «ونەر سالاسىنىڭ ۇزدىگى» بەلگىسى تابىس ەتىلدى. ولاردىڭ اراسىندا ج. ۆاليۋلليەۆتىڭ بولۋى دا زاڭدى ەدى.