داۋرەن ابايەۆ كوپبالالى انالاردىڭ ماسەلەسىنە قاتىستى پىكىر ءبىلدىردى
«بىردەن ايتايىن: الاڭعا شىققانداردىڭ بارىنە بىردەن ءۇي تاراتىپ بەرۋ دەگەن - اقىلعا سىيمايدى. مەملەكەت كوپبالالى انالارعا كومەكتەسۋدەن باس تارتىپ وتىرعان جوق. ءبىراق، بارلىق جاعدايدىڭ سانالى مەجەسى بولۋى كەرەك. بۇرىن دا ايتقان ەدىم، بۇگىن دە قايتالايمىن - قازىرگى تاڭدا بۇكىل ەل اۋماعىندا كوپبالالى وتباسىلار ءۇشىن سالىناتىن تۇرعىن ۇيلەردىڭ قۇرىلىسى باستالىپ كەتتى. وسىناۋ قور بىرنەشە جىلدىڭ ىشىندە بازالىق تۇرعىدا مۇقتاج وتباسىلاردىڭ قاجەتتىگىن جاۋىپ بەرەدى. ءۇي قۇرىلىسى اياقتالماي جاتقان كەزدە اكىمدىكتەر قولدا جوعىن قالاي تاۋىپ بەرە الادى؟ ءبىراق، وسىعان قاراماستان، ەلوردادا «تۇرعىن ءۇي جيناق بانكى» ارقىلى ونداعان وتباسى پاتەرگە نەمەسە جالعا بەرىلەتىن ۇيگە يە بولدى»، - دەدى داۋرەن ابايەۆ «حابار» ارناسىنداعى «اشىق ديالوگ» باعدارلاماسىندا.
مينيستر ءوز سوزىندە «بەرەكەلى باسپانا» باعدارلاماسى اياسىندا كوپبالالى وتباسىلار ءۇشىن قۇجات قابىلداۋ باستالىپ كەتكەنىن ەسكە سالدى.
«جىل باسىنان بەرى بيۋدجەتتىك ۇيىمداردىڭ قىزمەتكەرلەرىنە 1 ميلليون تەڭگەلىك باسپانالىق سەرتيفيكاتتار بەرىلۋدە. بۇل سوما - العاشقى جارنانى تولىقتاي جاۋىپ تۇر. وسىنىڭ ءبارى دە بيۋدجەت قاراجاتى ەسەبىنەن ىسكە اسىرىلىپ جاتىر»، - دەدى مينيستر.
ۆەدومستۆو باسشىسىنىڭ ايتۋىنشا، مەملەكەتتىڭ ازاماتتار الدىنداعى الەۋمەتتىك جاۋاپكەرشىلىگىن كوپشىلىك انىق تۇسىنبەي جاتىر.
«ءيا، ءبىزدىڭ مەملەكەت ءوزىن الەۋمەتتىك سالاعا بەيىمدەلەتىنىن جاريا ەتتى. مىنە، سوندىقتان، كوپبالالى وتباسىلارعا اتاۋلى الەۋمەتتىك كومەك تولەنۋدە. ول كومەكتىڭ ءوزى ورتاشا ەسەپپەن ءبىر وتباسىعا 100 مىڭ تەڭگەدەن كەم ەمەس. سونىمەن بىرگە، كوپبالالى وتباسىلاردىڭ بالالارى مەكتەپتە تەگىن تاماقتانادى. جەڭىلدىكپەن جول ءجۇرۋ، وقۋعا تۇسۋگە ارنالعان كۆوتا... ءبىراق، بۇل رەتتە ءوز ءومىرىڭ ءۇشىن جاۋاپكەرشىلىكتى وزىڭنەن تولىقتاي الىپ، مەملەكەتكە ارتىپ تاستاعانىڭ - قانشالىقتى دۇرىس؟!» - دەيدى مينيستر.
داۋرەن ابايەۆتىڭ ايتۋىنشا، وسى ۋاقىتقا دەيىن اكىمدىكتەرگە كەلىپ جۇرگەن انالاردىڭ كوبى جۇمىس سۇراپ كەلمەگەن.
«بىلىكتىلىكتى ارتتىرۋدى تالاپ ەتپەگەن. بولماسا، جوق دەگەندە كۇيەۋلەرىنىڭ ايلىق تابىسىن كوتەرۋدى سۇراپ كەلسە ءبىرسارى. بارلىعى دا - ءدال قازىر بىزگە ءۇي بەرىڭدەر، نەسيەمىزدى سىزىپ تاستاڭدار دەپ تالاپ قويادى. تاعى ءبىر مىسال كەلتىرەيىن: وسى جىلى كوپبالالى وتباسىلاردى كوشىرۋگە ارنالعان «نۇرلى ەرتىس» باعدارلاماسى ىسكە قوسىلدى. مىسالى، مامىر ايىندا عانا 52 وتباسى ەكىباستۇز قالاسىنا كوشىرىلدى. ونىڭ ۇستىنە پاۆلودار وبلىسىنىڭ اكىمدىگى ەرەسەكتەردى جۇمىسقا تۇرعىزۋعا مىندەتتەلىپ وتىر. بالاباقشالاردا تەگىن ورىن بەرىلمەك. وقۋشىلارعا كيىم دە، تاماقتانۋ دا تەگىن. ەلوردا اكىمدىگى مۇنداي وتباسىلاردىڭ سول جاققا كوشۋ شىعىنىن كوتەرەدى. ءبىراق، كوپتەگەن وتباسى مۇنداي كومەكتەن باس تارتتى. سەبەبى، ولار ءدال ەلوردادا پاتەر العىسى كەلەدى»، - دەدى داۋرەن ابايەۆ.