قىزمەتكەرى پارا السا ءبىرىنشى باسشى وتستاۆكاعا ءوتىنىش بەرۋگە مىندەتتى - ولجاس بەكتەنوۆ
«مەملەكەتتىك قىزمەتتە، ونىڭ ۇستىنە ساياسي مەملەكەتتىك قىزمەتتە جۇرگەن ادام مانساپ جولىنىڭ توسىننان ءۇزىلۋى مۇمكىن ەكەندىگىنە بارلىق ۋاقىتتا دايىن بولۋى ءتيىس. ال مۇنداي جايت ورىن الماۋى ءۇشىن باعىنىشتى قىزمەتكەرلەرىنە دۇرىستاپ قاراۋى قاجەت. ولاردىڭ تەك جۇمىس ۋاقىتىندا عانا ەمەس، ودان تىس ۋاقىتتا دا نەمەن اينالىساتىندىعىن، مۇنداي قۇقىق بۇزۋشىلىققا بەيىم بە ەكەندىگىن ءبىلۋ كەرەك. قۇقىق بۇزۋشىلىققا بەيىم بولسا، وندا ودان الدىن الا قۇتىلۋ قاجەت. قازىرگى ۋاقىتتا وعان بارلىق قۇقىقتىق تەتىكتەر بار»، - دەدى ول.
وسى رەتتە ءتوراعانىڭ ورىنباسارى قىزمەتكەرى پارا السا وندا ءبىرىنشى باسشى وتستاۆكاعا ءوتىنىش بەرۋگە مىندەتتى ەكەندىگىن باسا ايتتى.
«وزدەرىڭىز بىلەسىزدەر، ەل پرەزيدەنتى وسىنداي تاپسىرما بەردى. ەندى ونى «مەملەكەتتىك قىزمەت تۋرالى» زاڭعا ەنگىزەمىز. قازىرگى تاڭدا بىزدە ءبىر زاڭ جوباسى بار، ول پارلامەنتتە. سونىڭ اياسىندا وسىنداي نورما ەنگىزەمىز. نورما زاڭعا ەنسە بارلىعى دا جۇمىستان كەتۋگە مىندەتتى بولادى. ەگەر ورىنباسارى ۇستالسا وندا مينيستر وتستاۆكاعا ءوتىنىش بەرۋى كەرەكتىگىن پرەزيدەنت ايتتى. ال ونىڭ وتستاۆكاسىنىڭ قابىلدانۋى نە قابىلدانباۋى ەل پرەزيدەنتىنىڭ قۇزىرەتىندە. تەك مەملەكەت باسشىسى شەشىم قابىلدايدى»، - دەدى ولجاس بەكتەنوۆ.
اۆتور: مارلان جيەمباي