ەل ىشىندە دەمالۋ قانشا تۇرادى
«باعا ماۋسىمعا، دەمالاتىن جەرىنە، تۋريستىك ۇسىنىس قۇرىلىمىنا، تاماقتانۋعا (بارلىعى قامتىلعان، تەك تاڭعى اس جانە تاعى باسقاسى) جانە باسقا دا كوپتەگەن قوسالقى فاكتورلارعا بايلانىستى بولادى. مىسالى، شۋچە- بۋراباي كۋرورتتىق ايماعىندا ءۇش جۇلدىزدى قوناقۇيدە تاڭعى اس قامتىلعان ستاندارتتى نومىردە جازعى كەزدە دەمالۋ قۇنى ءبىر ەرەسەك ادامعا 10 مىڭ تەڭگەدەن 30 مىڭ تەڭگە ارالىعىندا بولادى. كوپتەگەن وتەلدەر جەڭىلدىكتەر ۇسىنادى، ال 5 جاسقا دەيىنگى بالالار تەگىن دەمالا الادى. مىسالى، سارىاعاش كۋرورتتىق ايماعىندا بەس رەت تاماقتانۋمەن جانە ەمدەۋ باعدارلاماسىمەن ستاندارتتى نومىردە تۇرۋ باعاسى 11-15 مىڭ تەڭگە ارالىعىندا. كوپتەگەن ساناتوريلەر دە بالالارعا جەڭىلدىكتەر ۇسىنادى»، - دەدى Primeminister.kz سايتىنا سۇحبات بەرگەن ءو. بيساقايەۆ.
كومپانيا باسشىسىنىڭ دەرەگىنشە، الاكول جاعالاۋىندا تولىق قىزمەت كورسەتىلەتىن دەمالىس بازالارىندا ءبىر ءنومىردىڭ قۇنى 10-12 مىڭ تەڭگە ارالىعىندا. مۇدان ەكى ەسە ارزان نەمەسە ءۇش ەسە قىمبات دەمالىس ورىندارىن دا تابۋعا بولادى. ءبارى تۋريستىڭ قالاۋىنا بايلانىستى.
«سونىمەن قاتار، ەل ىشىندە دەمالۋ قۇنىن تومەندەتۋ ماقساتىندا تۋريزم بويىنشا مەملەكەتتىك باعدارلامادا قازاقستاندىق كۋرورتتاردا دەمالعان جاعدايدا «1+2» سىزباسى بويىنشا (ءبىر اتا-اناعا ەكى بالا) KIDS GO FREE قاعيداتىمەن بالالارعا اۋە بيلەتتەرىنىڭ باعاسىن سۋبسيديالاۋ قاراستىرىلعان. بۇل شارا 5 ادامنان تۇراتىن وتباسى ەل ىشىندە دەمالىستى تاڭداعاندا وتباسىلىق بيۋدجەتتەن ورتا ەسەپپەن 100 مىڭ تەڭگەنى ۇنەمدەۋگە مۇمكىندىك جاسايدى»، - دەدى ول.
«Kazakh Tourism» باسشىسى سونداي-اق تۇركيانىڭ دەمالىس ورىندارى مەن بۋرابايدىڭ باعاسىن سالىستىرۋعا بولمايتىنىن ايتتى.
«بۇل ەكى نىسان ينفراقۇرىلىمنىڭ دامۋ دەڭگەيىمەن عانا ەمەس، تۋريستىك ۇسىنىستارمەن، تۋريستىك ماۋسىمنىڭ ۇزاقتىعىمەن جانە باسقا دا جاعدايلارمەن ەرەكشەلەنەدى. بۇل ورايدا بۋرابايدى انتاليامەن سالىستىرۋعا بولمايدى. بۇلاردىڭ ءبىر- بىرىنەن ايىرماشىلىقتارى بار. ءتىپتى باعاسى بىردەي بولعاننىڭ وزىندە ولار ءبىر- ءبىرىنىڭ ورنىن الماستىرا المايدى»، - دەدى باسقارما ءتوراعاسى.
كومپانيا باسشىسىنىڭ اتاپ وتۋىنشە، بۋراباي -بۇل ساناتوريلىك ەمدى ەسەپكە الماعاندا بىركۇندىك تۋرلار، دەمالىس كۇندەرى، قىسقا مەرزىمدى دەمالىس وتكىزىلەتىن جەر.
«ءتىپتى، بۇل جاعدايدا دا كەز كەلگەن قارجىعا دەمالاتىن ورىن: شاتىرلار مەن جەكە ۇيلەردەن باستاپ، بەسجۇلدىزدى قوناقۇيگە دەيىن تابۋعا بولادى. سەرۆيس دەڭگەيىنە بايلانىستى ماسەلەلەر بار. ءبىراق بۇل ۋاقىت پەن باسەكەنىڭ جەتكىلىكتى بولۋىن تالاپ ەتەتىندىكتەن، بىرتىندەپ جونگە كەلەتىن ماسەلە»، - دەدى ءو. بيساقايەۆ.