مەكسيكا استاناسىنداعى قازاقستان پاۆيلونىن ديماشتىڭ فاناتتارى جاۋلاپ الدى
شاراعا جەرگىلىكتى دياسپورالاردىڭ جانە 93 ەلدىڭ ديپلوماتيالىق ميسسيا وكىلدەرى قاتىستى. قازاقستاننىڭ پاۆيلونىن فەستيۆالدىڭ العاشقى كۇنى مەكسيكا استاناسىنىڭ مەرى مەحيكو كلاۋديا شەينباۋم كەلىپ كوردى.
«پاۆيلونعا كەلۋشىلەردىڭ نازارىنا ۇلتتىق قولونەر تۋىندىلارى، كادەسىيلار، ەلىمىز تۋرالى يسپان جانە اعىلشىن تىلىندەگى كىتاپتار ۇسىنىلدى. تەلەەكراندا قازىرگى قازاقستان تۋرالى ۆيدەوروليكتەر، قازاق حالقىنىڭ مادەنيەتى مەن بولمىسىن پاش ەتكەن دەرەكتى فيلمدەر مەن تاريحي تۋىندىلار كورسەتىلدى. ءبىر ايتا كەتەرلىگى، فەستيۆالدە ديماش قۇدايبەرگەننىڭ مەكسيكاداعى فان-كلۋبى ەرەكشە بەلسەندىلىك تانىتىپ، وتانداسىمىزدىڭ ومىرىمەن تەرەڭىرەك تانىسقانىن اتاپ ءوتۋ كەرەك»، - دەلىنگەن مينيسترلىكتىڭ حابارلاماسىندا.
پاۆيلوندا تۇسىرىلگەن شاعىن ۆيدەودان ديماش قۇدايبەرگەننىڭ مەكسيكالىق فان-كلۋبىنىڭ سالەم جولداپ جاتقانىن بايقاۋعا بولادى.
ەلشىلىكتىڭ جىل سايىن وتەتىن بۇل فەستيۆالگە قاتىسۋى قازاقستاننىڭ تانىمالدىعىن ارتتىرا تۇسەدى. اسىرەسە، بۇل جولعى شارا مەكسيكالىق جاستار ءۇشىن قازاقستاندى كەڭىرەك تانىتا تۇسكەنى انىق.