ۇلى دالا حيكايالارى: تارازدا ەرەكشە سۋرەت كورمەسى اشىلدى

تاراز. قازاقپارات - تارازدا تۇڭعىش رەت «ۇلى دالا حيكايالارى» اتتى سۋرەت كورمەسى اشىلدى. قازاقستاننىڭ زاماناۋي ونەر تۋىندىلارىن پاش ەتۋ ماقساتىندا ۇيىمداستىرىلعان شاراعا ەلىمىزدىڭ بەلدى قىلقالام شەبەرلەرىنىڭ سۋرەتتەرى قويىلىپ، كورەرمەندەرگە ۇسىنىلدى، دەپ حابارلايدى قازاقپارات.

وبلىستىق قازاق دراما تەاترىنىڭ فوەسىندە جاساقتالعان ەرەكشە كورمەدە ءداستۇرلى تەحنيكالارمەن ورىندالعان ءمۇسىن، كەسكىندەمە، گرافيكالارمەن قاتار، جاڭا جانر - ينستاللياتسيا، وبەكت، پەرفورمانس، ۆيدەو جانە مەديا- ارت باعىتتارى دا كەڭىنەن قامتىلعان. وندا الماگۇل مەڭلىبايەۆا، ساۋلە سۇلەيمەنوۆا، راشيد نۇرەكەيەۆ، اسحات احمەدياروۆ سىندى 10 نان استام بەلگىلى سۋرەتشىلەردىڭ تۋىندىلارى قويىلدى.

كورمەنىڭ حالىقارالىق جەتەكشىسى ليزا احمادي «الەمنىڭ 20 دان استام ەلدەرىندە ۇلكەن باعا العان تۋىندىلار ۇلتتىق بولمىسىمىزدى ايشىقتاپ، ونەر، مادەنيەت، تابيعات تاماشالارى سىندى قۇندىلىقتاردى سۋرەتتەيتىندىگىن ايتادى.

«ق ر تۇڭعىش پرەزيدەنتى ن. ءا. نازاربايەۆتىڭ «ۇلى دالانىڭ جەتى قىرى» اتتى ماقالاسىندا اتاپ كورسەتكەندەي، ۇلتتىق قۇندىلىقتار مەن رۋحاني بايلىق ءبىزدىڭ بىرەگەيلىگىمىزدىڭ نەگىزىنە اينالۋى ءتيىس. ەلباسى ماقالاسىنداعى كورسەتىلگەن «اتقا ءمىنۋ مادەنيەتى»، «ۇلى دالاداعى ەجەلگى مەتاللۋرگيا»، «التىن ادام»، «تۇركى الەمىنىڭ بەسىگى»، «ۇلى جىبەك جولى»، «قازاقستان - الما مەن قىزعالداقتىڭ وتانى» تاراۋلارىنداعى قازاق حالقىنىڭ ۇلتتىق تاريحىنان ورىن الاتىن دۇنيەلەر تۋرالى سىر شەرتەتىن تۋىندىلار كورمەدە قويىلدى»، - دەيدى ليزا احمادي.

ايتا كەتەيىك، بۇل ونەر تۋىندىلارىن قالا تۇرعىندارى الداعى 1 اي بويى جامبىل وبلىستىق دراما تەاترىنا بارىپ، تەگىن تاماشالاي الادى. سوسىن كوشپەلى كورمە كەرۋەنى  قىزىلوردا قالاسىنا جول تارتاتىن بولادى.