20:03, 05 - ماۋسىم 2019 | GMT +5
اۋىلعا جابايى قابان كىرىپ كەتتى
ورال. قازاقپارات - قازتالوۆ اۋدانىنىڭ ورتالىعى قازتالوۆ اۋىلىنا جابايى قابان كىرىپ كەتتى، دەپ حابارلايدى قازاقپارات ءتىلشىسى.
اۋداندىق پوليتسيا ءبولىمىنىڭ باستىعى رەنات دەگەنبايەۆتىڭ ايتۋىنشا، وقيعا بۇگىن ساعات 05.00 شاماسىندا ورىن الدى.
مالدارىن ورىسكە شىعارىپ جاتقان تۇرعىندار «مەزگىلسىز كەلگەن قوناقتان» قورقىپ، حابارلاسقان. اۆتوكولىككە شاپقان قاباننىڭ ادامداردى جازىم ەتۋى مۇمكىن ەدى. سوندىقتان ونى پوليتسيا قىزمەتكەرلەرىنىڭ اۋىلدان ايداپ شىعارۋىنا تۋرا كەلدى.
«اۋىل ىشىندە جۇرگەن قابان اۋەلى «قازپوشتا» بولىمشەسى، سودان كەيىن اۋدان اكىمدىگى عيماراتىنا قاراي قاشتى. قىزمەتتىك كولىككە نۇقسان كەلتىرمەۋدى ويلاپ (قاباننىڭ قوپارىپ تاستاۋى مۇمكىن عوي) ، جەكە اۆتوكولىكپەن قۋدى جىگىتتەر. اقىرى اۋىلدان شىعىپ كەتتى. ابىروي بولعاندا، ەشكىم زارداپ شەككەن جوق» ، - دەدى قازاقپارات تىلشىسىنە رەنات مارات ۇلى.