قازاقستاندىقتار ساپاسىز ازىق- تۇلىك تۋرالى اقپاراتتى ارنايى سايتتان كورە الادى
تاۋار ساپاسى مەن قاۋىپسىزدىگىن قاداعالاۋ كوميتەتى مونيتورينگ بارىسىندا دەنساۋلىققا زيان ەكەنى انىقتالعان ازىق- تۇلىك تۋرالى اقپاراتتى تالاپقا ساي كەلمەيتىن ونىمدەر تىزىمىنە سالىپ وتىراتىن بولدى.
تالاپقا ساي كەلمەيتىن ونىمدەر ءتىزىمىن رەەستردەن كورۋگە بولادى. ول رەەستر كوميتەتتىڭ ارنايى سايتىندا تۇر. تىزىمنەن قايسى ءونىم ساپاسىز تاۋار قاتارىنا جاتقىزىلعانىن باقىلاۋ مۇمكىندىگى بار.
«قازىرگى ۋاقىتتا دەنساۋلىق ساقتاۋ مينيسترلىگىنىڭ سيفرلاندىرۋ كەڭسەسى اتالمىش سايتتى جاڭعىرتىپ جاتىر. ياعني، ءاربىر ءونىم بويىنشا شتريح كودتى بىرگە بەرەدى. وسىلايشا، الداعى ۋاقىتتا ساپاسىز ونىمدەردى انىقتايتىن ارنايى موبيلدى قوسىمشا جاسالادى. وسىدان كەيىن ءبىز سمارتفون ارقىلى دۇكەننىڭ ءدال وزىندە قاي ءونىمنىڭ ساپالى نەمەسە ساپاسىز ەكەنىن انىقتاي الامىز»، - دەپ جازدى دەنساۋلىق ساقتاۋ ۆيتسە- ءمينيسترى ولجاس ابىشيەۆ Facebook پاراقشاسىندا.
ونىڭ مالىمەتىنە سۇيەنسەك، قازاقستاندا جىل سايىن 22 توننا قاۋىپتى تاماق ءونىمى جويىلادى. اي سايىن ق ر دەنساۋلىق ساقتاۋ مينيسترلىگى تاۋارلاردىڭ ساپاسى مەن قاۋىپسىزدىگىن قاداعالاۋ كوميتەتى قاۋىپتى ساناتقا جاتقىزىلعان 100 ءونىم مەن تاۋار ءتۇرىن انىقتاۋدا.
اۆتور: ايان بەكەن ۇلى