اتۋعا تىيىم سالۋدىڭ ناتيجەسى: جابايى اڭدار كوبەيدى
2016 -جىلدان باستاپ شىعىس قازاقستان اۋماعىندا كوكتەم ايلارىندا اڭ اتۋعا تىيىم سالىنعان بولاتىن. بۇل شارانىڭ قانشالىقتى ناتيجە بەرگەنىن ءبىلۋ ءۇشىن وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسى ساناق جۇرگىزگەن. باسقارما باسشىسىنىڭ ورىنباسارى ارمان ەسەنتايەۆتىڭ ايتۋىنشا، ساناق ناتيجەسى اڭداردىڭ ءبىرشاما وسكەنىن بايقاتىپ وتىر.
«2014 -جىلمەن سالىستىرعاندا قوڭىر اڭنىڭ سانى 25759 دان 27401 باسقا، ايۋدىڭ سانى 2199 دان 2295 كە، قاباندار 1375 تەن 1811 گە، تاۋەشكى 960 تان 1030 عا كوبەيدى. سونىمەن قاتار، ساڭىراۋ قۇرلار 19,8 پايىزعا ارتىپ، سانى 4246 عا جەتتى» ، - دەيدى باسقارما وكىلى.
ارمان ەسەنتايەۆ كوكتەمدە اڭ اتۋعا تىيىم سالىنۋىنىڭ ارقاسىندا تەرىسى باعالى اڭداردىڭ ازايۋى توقتاعانىن ايتادى. بۇلعىن، كۇزەن، سىلەۋسىن، سۋىر سياقتى تەرىسى قىمبات اڭداردىڭ سانى 2014 -جىلى 154872 بولسا، 2019 -جىلى 163874 كە جەتكەن.