نىعماتۋلين ءبىلىم مينيسترىنە: قىركۇيەكتە بالالار مەكتەپكە بارسا، ءسىز ماجىلىسكە كەلەسىز
بۇل تۋرالى پارلامەنت ءماجىلىسىنىڭ ءتوراعاسى نۇرلان نىعماتۋلين ايتتى، دەپ حابارلايدى قازاقپارات ءتىلشىسى.
«وسى سالاداعى ماسەلەلەردى رەتكە كەلتىرۋ كەرەك، سەبەبى بۇل سالا ەرەكشە ەكەنىن بىلەسىزدەر. ءبىلىم سالاسى حالىقتى كەڭىنەن قامتىپ وتىر. وسى باعىتقا قاجەتتى قارجى ءبولىندى، بارلىق سۇراقتار شەشىلدى. سوندىقتان ءبىلىم سالاسى جوعارى دەڭگەيدە زامان تالابىنا ساي بولۋى ءتيىس. ەسەپ كوميتەتىنىڭ مالىمەتىنشە، مەملەكەتتىك بيۋدجەتتە ءبىلىم بەرۋ سالاسىنىڭ ۇلەسى 17 پايىزعا جۋىعىن قۇراپ وتىر، ياعني قارجى بار. سونىمەن قاتار، ءتيىستى باعدارلامالار ىسكە قوسىلعان، الايدا بۇل سالاعا قويىلىپ جاتقان سۇراقتار ءالى دە بارشىلىق»، - دەدى ن. نىعماتۋلين ءماجىلىستىڭ جالپى وتىرىسىندا.
مۇنىمەن قوسا، ءماجىلىس ءتوراعاسى ءبىلىم جانە عىلىم مينيسترىلىگى باسشىلىعىنا پارلامەنتتە ءبىلىم سالاسىنا قاتىستى ماسەلەلەردى ۋاقتىلى قاراستىرۋ كەرەكتىگىن ەسكەرتتى.
«پارلامەنتكە زاڭ جوباسىن، ۇكىمەت ساعاتىن كەيىنگە شەگەرۋ تۋرالى وتىنىشتەرىڭىزدى جولداعاندى دوعارىڭىزدار، وسىنداي جاعداي بىرنەشە مارتە قايتالاندى. پارلامەنتتەن قاشۋدىڭ قاجەتى بار ما؟ ءبىلىم جانە عىلىم مينيسترلىگىنىڭ ەسەبىن ماجىلىستە تىڭدايىق. بۇل سالا ماڭىزدى بولعاندىقتان، اتقارىلعان جۇمىستاردى تالقىلاۋ قاجەت. وسى ماسەلەلەردى ۇكىمەت ساعاتىنان بولەك، ءبىلىم تاقىرىبىنا ارنالعان پارلامەنتتىك تىڭداۋدا قاراستىرعان ءجون. كۇلاش نوعاتاي قىزى (ءبىلىم ءمينيسترى - اۆت.)، قىركۇيەكتە سىزدەردى ماجىلىستەگى ۇكىمەت ساعاتىندا كۇتەمىز. بالالار قىركۇيەكتە مەكتەپكە بارسا، ءسىز ماجىلىسكە كەلەتىن بولاسىز»، - دەدى ن. نىعماتۋلين ق ر ءبىلىم جانە عىلىم ءمينيسترى كۇلاش ءشامشيدينوۆاعا قاراتا ايتقان سوزىندە.