گولوۆكين مەن روللستىڭ نيۋ-يوركتەگى اشىق جاتتىعۋىنىڭ ۆيدەوسى جاريالاندى

نۇر-سۇلتان. قازاقپارات - قازاقستاندىق بوكسشى گەننادي گولوۆكين (38-1-1، 34 ك و) مەن كانادالىق ستيۆ روللس (19-0، 10 ك و) جەكپە-جەك الدىنداعى وزدەرىنىڭ دايىندىقتارىن كورسەتتى، دەپ حابارلايدى قازاقپارات Sports.kz سايتىنا سىلتەمە جاساپ.

بوكس جانكۇيەرلەرى مەن فاناتتار جانە جۋرناليستەر ءۇشىن اشىق وتكىزىلگەن گولوۆكين مەن روللستىڭ جاتتىعۋلارى ەكى بوكسشىنىڭ الداعى كەزدەسۋى وتەتىن Madison Square Garden ارەناسىندا بولدى.

ايتا كەتەيىك، گولوۆكين- روللس كەزدەسۋى 9 -ماۋسىم كۇنى تاڭ اتا وتەدى. بۇل 37 جاستاعى قازاقستاندىق بوكسشىنىڭ DAZN ستريمينگ الاڭىنداعى دەبيۋتى بولماق. جۋىردا عانا ول جاڭا تەلەسەرىكتەسپەن قۇنى 100 ميلليون دوللاردى قۇرايتىن كەلىسىمشارتقا قول قويدى. كەلىسىم تالاپتارىنا سايكەس، قازاقستاندىق بوكسشى DAZN الاڭىندا ەكى جىلدا 6 كەزدەسۋ وتكىزۋى كەرەك.