مەملەكەت اۋىل حالقىنا قانداي قولداۋ كورسەتكەلى وتىر

نۇر- سۇلتان. قازاقپارات - ۇلتتىق ەكونوميكا مينيسترلىگى «اۋىل - ەل بەسىگى» جوباسى اياسىندا اۋىل حالقىنا قانداي قولداۋ تەتىكتەرى كورسەتىلەتىنىن اتادى، دەپ حابارلايدى قازاقپارات ءتىلشىسى.

ۇلتتىق ەكونوميكا ۆيتسە- ءمينيسترى ەرمەك الپىسوۆتىڭ قازاقپارات تىلشىسىنە بەرگەن رەسمي جاۋابىنا سۇيەنسەك، جوبا اياسىندا ەڭ الدىمەن اۋدان ورتالىقتارى مەن تىرەك اۋىلدارعا ماڭىز بەرىلەدى.

«اۋىل - ەل بەسىگى» جوباسى اياسىندا ينفراقۇرىلىمدىق جوبالاردى ىسكە اسىرۋ كەزىندە قولدانىستاعى مەملەكەتتىك باعدارلامالار شەڭبەرىندە «بيۋدجەتتىك سۇزگىنى» (باسىم قارجىلاندىرۋدى) قامتاماسىز ەتە وتىرىپ، تىرەك اۋىلداردى دامىتۋعا كەشەندى ءتاسىل قولدانىلادى. جوباعا اۋىل حالقىنىڭ ەڭ كوپ سانى بار الەۋمەتتىك- ەكونوميكالىق دامۋدىڭ جوعارى جانە ورتاشا الەۋەتى بار اۋىلدار كىرەدى. 2019 -جىلى حالىقتىڭ ەڭ كوپ سانى بار ءىرى ەلدىمەكەندەر - اۋدان ورتالىقتارىنا باسا نازار اۋدارىلدى. ولاردا جينالعان قوردالانعان ينفراقۇرىلىمدىق پروبلەمالاردى تەز ارادا شەشۋ تالاپ ەتىلەدى»، - دەلىنگەن ەرمەك الپىسوۆتىڭ جاۋابىندا.

ۆيتسە- ءمينيستردىڭ جاۋابىنا سۇيەنسەك، تىرەك اۋىلداردى دامىتۋ حالىقتى جاقىن ماڭداعى اۋىلداردان، ونىڭ ىشىندە حالىق سانى 50 ادامنان كەم ەلدى مەكەندەردەن كوشىرۋگە ىقپال ەتەتىن بولادى.

«وبەكتيۆتى سەبەپتەر بويىنشا (شارۋاشىلىقتىڭ، جەردىڭ بولۋى) باسقا اۋىلدارعا قونىس اۋدارعىسى كەلمەيتىن از قونىستانعان اۋىل تۇرعىندارى ءۇشىن جەرگىلىكتى اتقارۋشى ورگاندار تۇرۋدىڭ بازالىق جاعدايلارىمەن قامتاماسىز ەتۋى ءتيىس. مىسالى، بالالاردى مەكتەپكە جەتكىزۋ، مەديتسينالىق قىزمەتكەرلەردىڭ شىعۋىن جۇەزە اسىرۋ، تاسىمالداناتىن سۋمەن قامتاماسىز ەتۋ جانە باسقالار»، - دەلىنگەن جاۋاپتا.

ەرمەك الپىسوۆ جالپى، قازىرگى تاڭدا اۋىلدى ەلدىمەكەندەردى دامىتۋ بويىنشا مەملەكەت تاراپىنان جەتكىلىكتى دەڭگەيدە قولداۋ كورسەتىلىپ جاتقانىن حابارلايدى. ماسەلەن، زاڭعا سايكەس، اۋىلدى جەرلەردە جۇمىس ىستەيتىن ماماندار ءۇشىن كەمىندە 25 پايىزعا جوعارىلاتىلعان ايلىق پەن تاريفتىك مولشەرلەمەلەر بويىنشا جەڭىلدىك، وتىن ساتىپ الۋعا الەۋمەتتىك كومەك، قىزمەتتىك تۇرعىن ۇيمەن قامتاماسىز ەتۋ تۇرىندە مەملەكەتتىك قولداۋ شارالارى كوزدەلگەن.

«بيزنەستىڭ جول كارتاسى 2020» مەملەكەتتىك باعدارلاماسى شەڭبەرىندە شاعىن كاسىپكەرلىك سۋبەكتىلەرىنە، ونىڭ ىشىندە ءىسىن جاڭا باستاعان جاس كاسىپكەرلەرگە جاڭا بيزنەس- يدەيالاردى ىسكە اسىرۋ ءۇشىن مەملەكەتتىك گرانتتار قاراستىرىلعان. سونداي- اق، اۋىلدى ەلدى مەكەندەردىڭ الەۋمەتتىك جانە ينجەنەرلىك ينفراقۇرىلىمدارىن سالۋ، قايتا جاڭعىرتۋ جانە جوندەۋگە باعىتتالعان «اۋىل - ەل بەسىگى» جوباسى ىسكە قوسىلدى. جوبانىڭ شەڭبەرىندە 2019-2021 -جىلدارى 90 ميلليارد تەڭگە باعىتتالاتىن بولادى. وسى جىلى 30 ميلليارد تەڭگە ءبولىندى. بۇدان بولەك، اۋىلدى ەلدى مەكەندەرگە الەۋمەتتىك سالا جانە اگروونەركاسىپتىك كەشەن ماماندارىن تارتۋعا ارنالعان «ديپلوممەن اۋىلعا» جوباسى ىسكە اسىرىلۋدا. «ديپلوممەن اۋىلعا» جوباسىنىڭ شەڭبەرىندە اۋىلدى ەلدى مەكەندەرگە جۇمىس ىستەۋ جانە تۇرۋ ءۇشىن كەلگەن الەۋمەتتىك سالا جانە اگروونەركاسىپتىك كەشەن ماماندارىنا ءبىر رەتتىك كوتەرمە جاردەماقى (70 اەك) جانە تۇرعىن ءۇي ساتىپ الۋعا بيۋدجەتتىك نەسيە (1500 اەك) ۇسىنىلادى»، - دەپ جاۋاپ بەردى ەرمەك الپىسوۆ.

ەسكە سالا كەتسەك، وسىدان بىرنەشە كۇن بۇرىن ەلوردادا وتكەن باسپا ءسوز ءماسليحاتىندا ۇلتتىق ەكونوميكا ۆيتسە- ءمينيسترى ەرمەك الپىسوۆ قازاقستان حالقىنىڭ جالپى سانى 2025 -جىلعا قاراي 20 ميلليون ادامعا جەتەتىنىن بولجاعان بولاتىن. ۆيتسە- ءمينيستردىڭ پايىمداۋىنشا، بۇل رەتتە اۋىل حالقىنىڭ سانى ءىس جۇزىندە 7,6 ميلليون دەڭگەيىندە قالادى دا، اۋىل حالقىنىڭ ۇلەسى 42 پايىزدان 38-گە دەيىن تومەندەيدى.

سونداي- اق، ەرمەك الپىسوۆ بولاشاعى جوق اۋىلداردىڭ حالقىنا مەملەكەت قانداي قولداۋ كورسەتەتىنىن ايتىپ بەرگەن ەدى.

اۆتور: ايان بەكەن ۇلى