قازاقستان مەن يتاليانىڭ اسكەري- تەڭىز كۇشتەرى ىنتىماقتاستىق ماسەلەلەرىن تالقىلادى

نۇر- سۇلتان. قازاقپارات - قازاقستاننىڭ جانە يتاليانىڭ اسكەري- تەڭىز كۇشتەرىنىڭ وكىلدەرى ەكىجاقتى اسكەري ىنتىماقتاستىق ماسەلەلەرىن تالقىلادى. بۇل تۋرالى قر قورعانىس مينيسترلىگىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات.

«اسكەري ىنتىماقتاستىق جوسپارىنا سايكەس، نۇر- سۇلتان قالاسىنداعى ۇلتتىق اسكەري- پاتريوتتىق ورتالىقتا قازاقستان رەسپۋبليكاسىنىڭ جانە يتاليا رەسپۋبليكاسىنىڭ اسكەري- تەڭىز كۇشتەرى وكىلدەرىنىڭ كەزدەسۋى ءوتتى. ونىڭ اياسىندا تاراپتار 2019 -جىلعا ارنالعان اسكەري ىنتىماقتاستىق جوسپارىندا كورسەتىلگەن اسكەري- تەڭىز كۇشتەرىنىڭ باعىتى بويىنشا جۇرگىزىلەتىن الداعى ءىس- شارالاردى تالقىلادى. اسىرەسە قازاقستاننىڭ اسكەري- تەڭىز كۇشتەرىنىڭ وسى جىلدىڭ ەكىنشى جارتى جىلدىعىندا ۆەنەتسيا قالاسىندا وتەتىن اسكەري- تەڭىز كۇشتەرىنىڭ XII سيمپوزيۋمىنا قاتىسۋ مۇمكىندىگى ءسوز بولدى»، - دەلىنگەن باسپا ءسوز حابارلاماسىندا.

بۇدان بولەك قازاقستاندىق اسكەري تەڭىزشىلەردىڭ يتاليانىڭ اسكەري- تەڭىز كۇشتەرىنىڭ سۋاستى ميناسىزداندىرۋ سالاسىنداعى ساراپشىلارىمەن كەزدەسۋلەرىن ۇيىمداستىرۋ ماسەلەسى قاراستىرىلدى.

كەزدەسۋ ناتيجەسى بويىنشا اسكەري- تەڭىز كۇشتەرىن دامىتۋ سالاسىنداعى ىنتىماقتاستىقتىڭ پەرسپەكتيۆالى باعىتتارى انىقتالدى.