ەلوردادا كوپبالالى وتباسىعا ارەندالىق باسپانا قانشا جىلعا بەرىلەدى

نۇر- سۇلتان. قازاقپارات - نۇر- سۇلتان قالاسى اكىمىنىڭ ورىنباسارى ەرلان قاناليموۆ «بەرەكەلى باسپانا» باعدارلاماسىن كەڭىرەك ءتۇسىندىردى، دەپ حابارلايدى قازاقپارات ءتىلشىسى.

 «كوپبالالى انالار ماسەلەسى كۇن تارتىبىنەن ەشقاشان تۇسكەن ەمەس. بۇگىن ءبىرىنشى كەزەڭدى باستادىق. كوپبالالى انالاردىڭ باسپانا ماسەلەسى ەكى جاعداي بويىنشا شەشىلۋى كەرەك ەدى: جالدامالى ۇيگە سەرتيفيكات بەرۋ جانە تۇرعىن ءۇي قۇرىلىس جيناق بانكى ارقىلى 2 پايىزبەن نەسيەگە باسپانا ساتۋ. نەسيەلىك باسپانا بويىنشا باعدارلاما ەرەجەسى بەكىتىلدى، ءبىراق بانكتىڭ ىشكى قۇجاتتارى دايىن ەمەس. ءبىزدىڭ ەسەبىمىزشە، بۇل باعدارلاما 17 -  ماۋسىم مەن شىلدەنىڭ باسىندا ىسكە قوسىلۋى كەرەك. 2 پايىز نەسيەلىك باسپانا الاتىن وتباسى تابىسىن كورسەتۋى ءتيىس. وعان العاشقى 10 پايىز جارنا بولماعان جاعدايدا اكىمدىكتەن 1 ميلليون تەڭگە كولەمىندە كومەك الۋعا بولادى. بيىل اكىمدىك تاراپىنان 1 ميلليون تەڭگەلىك 1 مىڭ سەرتيفيكات ازىرلەندى»، - دەپ اتاپ ءوتتى ە. قاناليموۆ اكىمدىكتە وتكەن باسپا ءسوز ءماسليحاتىندا.

ارەندالىق باسپانا بويىنشا بيىل 928 پاتەر بولىنەدى. سونىڭ 150- ءى كەزەك باسىندا تۇرعان كوپبالالى وتباسىلارعا ارنايى سەرتيفيكات ارقىلى بەرىلەدى.

«بۇل سەرتيفيكاتتا ارەندالىق باسپانانىڭ مەكەنجايى، بەرىلگەن كۇنى كورسەتىلەدى. ءبىرىنشى كەزەڭدە 15 - شىلدەدەن 1 - تامىزعا دەيىن ازاماتتار ءوز ۇيلەرۋىنە كىرۋى كەرەك. ولار اكىمدىكتىڭ تۇرعىن ءۇي قورىمەن بەس جىلعا كەلىسىمشارت جاسايدى. بۇل كەلىسىمشارتتى ءارى قاراي سوزۋعا بولادى. ياعني، ەشكىم بەس جىلدان كەيىن قۋىلمايدى. سوزۋ ءۇشىن قايتا قۇجات تاپسىرۋ كەرەك، ول ءۇشىن تۇرعىنداردىڭ اتىندا وزگە باسپانا بولماۋى ءتيىس»، - دەپ ءتۇسىندىردى اكىم ورىنباسارى.

ونىڭ ايتۋىنشا، جىل سوڭىنا دەيىن تاعى 200 كوپبالالى وتباسىن باسپانامەن قامتۋ جوسپارلانعان.

ايتا كەتەيىك، ەلوردالىق «بەرەكەلى باسپانا» باعدارلاماسى اياسىندا «كوپبالالى وتباسى» ساناتىندا تۇرعىن ءۇي كەزەگىندە تۇرعاندارعا 150 پاتەرگە سەرتيفيكات بەرۋ باستالدى.

«كوپبالالى وتباسى» ساناتىندا تۇرعىن ءۇي كەزەگىندە تۇرعاندار نۇر- سۇلتان قالاسى اكىمدىگىنىڭ «تۇرعىن ءۇي قورى» كوممۋنالدىق مەملەكەتتىك مەكەمەسىنە (ر. قوشقاربايەۆ كوشەسى 39) جۇگىنۋى ءتيىس (بايلانىس ءنومىرى: 79-34-50).

بۇگىندە ەلوردادا 46 مىڭ ادام تۇرعىن ءۇي كەزەگىندە تۇر. ونىڭ 3 مىڭنان استامى - كوپبالالى وتباسى.

اۆتور: ايجان سەرىكجان قىزى