ون ەلدىڭ سۋرەتشىلەرى التايداعى كاتونقاراعايدىڭ تابيعاتىن سالادى
پلەنەرگە گەرمانيا، فرانسيا، تۇركيا، ازەربايجان، وزبەكستان، قىرعىزستان، ليتۆا، گرۋزيا، رەسەي جانە ەلىمىزدىڭ بىرنەشە وڭىرىنەن 20 سۋرەتشى شاقىرتۋ العان. «ۇلى دالا پاليتراسى» دەگەن تاقىرىپپەن وتەتىن شارا «رۋحاني جاڭعىرۋ»، «ۇلى دالانىڭ جەتى قىرى» باعدارلامالىق ماقالالارى مەن جاستار جىلىن قابات ۇشتاستىرىپ وتىر.
«مۇنداي پلەنەر شىعىستا وسىمەن ەكىنشى رەت ۇيىمداستىرىلىپ وتىر. بىلتىرعى شاراعا ەلىمىزدىڭ ەڭ تانىمال 20 سۋرەتشىسى قاتىسقان بولاتىن. سونىڭ ارقاسىندا وبلىس مۋزەيلەرىنىڭ قورى 135 تۋىندىمەن تولىققان. بيىل الەم سۋرەتشىلەرى كاتونقاراعايداي تاريحي مەكەننىڭ اۋراسىن جان-تانىمەن سەزىنىپ، كەرەمەت تۋىندىلار دۇنيەگە اكەلەدى دەگەن ءۇمىتىمىز بار. سۋرەت ونەرىنە اۋدارما قاجەت ەمەس. پاريج بەن بەرليننەن، تبيليسي مەن قازاننان، ۆيلنيۋس پەن انكارادان كەلگەن قىلقالام شەبەرلەرىنىڭ ارقاسىندا ۇلى دالانىڭ ۇلى تاريحى حالىقارالىق كورمەلەردە سۋرەت تىلىندە سويلەيتىن بولادى»، - دەيدى وبلىس اكىمىنىڭ ورىنباسارى اسەم ءنۇسىپوۆا.
سۋرەتشىلەر 4-11 -ماۋسىم ارالىعىندا ايگىلى راحمان قاينارى مەن بەرەلدەگى پاتشالار جازىعىندا قونا جاتىپ، سۋرەت سالاتىنى جوسپارلانعان.
«التاي تۋرالى ولەڭ مەن پوەما، ءان مەن كينو كوپ. سودان دا بولار، تۇركى الەمىنىڭ التىن بەسىگىن تانۋعا بۇكىل الەم قۇشتار. پلەنەرگە قاتىسۋشى ءار سۋرەتكەردىڭ كوكىرەك كوزى، سۋرەت ءتىلى ءارقيلى. التايدان العان شابىتى سۋرەتكە تۇسسە، كەيىن ول كەسكىندەر ءوز وتانداستارىنىڭ بۇل جاققا دەگەن قىزىعىشۋلىعىن وياتادى. پلەنەردىڭ ماقساتى دا سول»، - دەيدى شارانىڭ ۇيلەستىرۋشىسى، بەلگىلى سۋرەتشى ەسەنعالي سادىربايەۆ.
پلەنەردىڭ قورىتىندىسى 13 -ماۋسىمدا شىعارىلادى. «جاستار ارباتى» دەگەن اتپەن بوياۋى كەۋىپ ۇلگەرمەگەن تىڭ تۋىندىلاردىڭ كورمەسى ۇيىمداستىرىلىپ، ونداعى سۋرەتتەردىڭ ءبىر بولىگى ايماق مۋزەيلەرىنىڭ سۋرەت قورىن تولتىرماق.