وليمپيادا چەمپيونىنىڭ جۇبايى شىعىس قازاقستان دەنە شىنىقتىرۋ باسقارماسىنىڭ باسشىسى بولدى
باسقارما ۇجىمىنا جاڭا باسشىنى تانىستىرعان وبلىس اكىمى دانيال احمەتوۆ دەنيس رىپاكوۆتىڭ تاجىريبەسى مول مامان ەكەنىن ايتا كەلە، بۇل تاعايىنداۋ ءوڭىر سپورتىنىڭ دامۋىنا تىڭ سەرپىن بەرەتىنىنە سەنىم ءبىلدىردى.
«بۇل ازاماتتى بارلىعىڭىز دا جاقسى بىلەسىزدەر. دەنيس رىپاكوۆ - تانىمال سپورتشى عانا ەمەس، سونداي-اق وسى سالادا ءتۇرلى باسشىلىق قىزمەت اتقارعان بىلىكتى مامان، تاجىريبەلى باسشى. ماسەلەن، ول بۇگىندە وسكەمەندەگى ولگا رىپاكوۆا اتىنداعى جەڭىل اتلەتيكا ورتالىعىن باسقارىپ، ءوڭىر سپورتى ءۇشىن عانا ەمەس، رەسپۋبليكالىق ماڭىزعا يە جۇمىستاردىڭ باسى-قاسىندا ءجۇر. دەنيس رىپاكوۆ رەسپۋبليكالىق جەڭىل اتلەتيكا فەدەراتسياسىمەن دە تىعىز بايلانىستا. ول - ەلىمىزدەگى اتالمىش سپورت ءتۇرىنىڭ بەتكەۇستار ماماندارىنىڭ ءبىرى. سوندىقتان دەنيستى وسىنداي باسشىلىق قىزمەتكە تاعايىنداۋ وتە ورىندى شەشىم دەپ بىلەمىن. جاڭا باسشى سەنىم ۇدەسىنەن شىعاتىنىنا كۇمانىم جوق»، - دەدى ايماق باسشىسى.
ايتا كەتەيىك، ش ق و-نىڭ دەنە شىنىقتىرۋ جانە سپورت باسقارماسىن بۇعان دەيىن اسقار موجانوۆ باسقارىپ كەلدى.
دەنيس سەرگەيەۆيچ رىپاكوۆ 1980 -جىلى 20 -تامىزدا الماتى قالاسىندا دۇنيەگە كەلگەن. ماماندىعى بويىنشا - دەنە شىنىقتىرۋ مۇعالىمى. 2001 -جىلى قازاق مەملەكەتتىك دەنە شىنىقتىرۋ جانە سپورت اكادەمياسىنىڭ دەنە شىنىقتىرۋ ينستيتۋتىن اياقتاعان. قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى جانە ق ر سپورت شەبەرى. ەڭبەك جولىن 2001 -جىلى ەلوردادا «شتاتتىق ۇلتتىق كوماندالار جانە سپورتتىق رەزەرۆ ديرەكسياسىندا» نۇسقاۋشى رەتىندە باستاعان. كەيىن ۇلتتىق قاۋىپسىزدىك كوميتەتىنىڭ اسكەري ينستيتۋتىندا - مامان، «شتاتتىق ۇلتتىق كوماندالار جانە سپورتتىق رەزەرۆ ديرەكتسياسىندا» - باپكەر بولىپ ەڭبەك ەتتى.
2013 -جىلدان باستاپ «ش ق و جەڭىل اتلەتيكادان مامانداندىرىلعان بالالار-جاسوسپىرىمدەر وليمپيادالىق رەزەرۆ سپورت مەكتەبىن» باسقاردى.
ونىڭ سپورتشى رەتىندە دە جەتكەن جەتىستىكتەرى از ەمەس. ماسەلەن، ول 2003 -جىلى وڭتۇستىك كورەيانىڭ تەگۋ قالاسىندا وتكەن دۇنيەجۇزىلىك ۋنيۆەرسيادادا 400 مەترگە جۇگىرۋ سايىسىندا كۇمىس جۇلدەگە يە بولدى.
دەنيس رىپاكوۆ وليمپيادا چەمپيونى ولگا رىپاكوۆانىڭ جۇبايى، ەكى بالا تاربيەلەۋدە.