تۇركىستان وبلىسىنىڭ پوليتسەيلەرى ساۋدا ورىندارىن جاپپاي تەكسەرۋدە
باسپا ءسوز مالىمەتتەرىنە قاراعاندا اتالمىش شارالار ق ر ىشكى ىستەر مينيسترلىگىنىڭ پوليتسەيلەرگە جۇكتەگەن جەدەل-پروفيلاكتيكالىق ءىس-شارالارىنىڭ اياسىندا جۇزەگە اسىرىلعان.
ناقتىراق ايتقاندا، وبلىستا تۇركىستان، سارىاعاش، سايرام، جەتىساي سەكىلدى ءبىرقاتار قالا، اۋداندارىندا جەدەلدەتىلگەن پروفيلاكتيكالىق ءىس-شارالار كەشەنى جۇرگىزىلدى.
ماسەلەن، تۇركىستان قالاسىندا ورنالاسقان بازارلاردىڭ بىرىنەن ۇيالى تەلەفونداردى الىپ ساتۋ جانە جوندەۋ جۇمىستارىمەن اينالىساتىن ازاماتتاردىڭ اراسىندا ءداستۇرلى ەمەس دەسترۋكتيۆتىك ءدىني اعىمدى ۇستانۋشىلارى مەن ولاردىڭ جاقتاستارى بار ەكەندىگى بەلگىلى بولدى.
تىڭعىلىقتى تەكسەرۋ ناتيجەسى كورسەتكەندەي، كۇدىكتىلەر قىلمىستىق جولمەن ۇرلانعان ۇيالى تەلەفونداردى الىپ ساتۋ، الەۋمەتتىك، ۇلتتىق، ناسىلدىك نەمەسە ءدىني الاۋىزدىقتى قوزدىرۋ ءىس-ارەكەتتەرىن ىسكە اسىرۋ ارقىلى، ۇيالى تەلەفونعا ارنايى دەسترۋكتيۆتىك اعىمدى ناسيحاتتايتىن مالىمەتتەردى جۇكتەي وتىرىپ، تۇتىنۋشىلاردى ارانداتقان.
بۇل ءىستى پوليتسەيلەر ق ر قىلمىستىق كودەكستىڭ 174-بابى «الەۋمەتتىك، ۇلتتىق، رۋلىق، ناسىلدىك، تەكتىك-توپتىق نەمەسە ءدىني الاۋىزدىقتى قوزدىرۋ» بويىنشا ارنايى تىركەۋگە الدى.
قازىرگى تاڭدا ءتارتىپ ساقشىلارى كۇدىكتى رەتىندە ۇستالعان ءۇش ازاماتقا قاتىستى تەرگەپ- تەكسەرۋ امالدارىن جۇرگىزىپ، ۋاقىتشا قاماۋعا الدى. ايعاق زاتتار تاركىلەنىپ، ساراپتامالار تاعايىندالدى. وبلىس پوليتسەيلەرى سوتقا دەيىنگى تەرگەپ-تەكسەرۋ جۇمىستارىن جۇرگىزۋدە. بۇل ءىس اياقتالعان سوڭ، جيناقتالعان بارلىق ماتەريالدار ناقتى شەشىم شىعارۋ ءۇشىن سوتقا جولدانادى.