بۋرابايدا «جايلاۋ» ەتنواۋىلى اشىلدى
اقمولا وبلىسىنىڭ «VISITAQMOLA» تۋريستىك اقپارات ورتالىعىنىڭ مالىمەتىنشە، ەتنواۋىلدىڭ اشىلۋىندا كۋرورتتى ايماقتىڭ تۇرعىندارى مەن قوناقتارى ساداق اتىپ، سالت اتپەن ءجۇرىپ، قولونەر شەبەرلەرىنىڭ شەبەرلىك سىنىپتارىنا قاتىسىپ، نومادتاردىڭ داستۇرىنە قانىعۋ مۇمكىندىگىن الدى.
سونداي- اق، قازاق كۇرەسى، بايگە، اسىق اتۋ، اۋدارىسپاق سياقتى ۇلتتىق سپورت ويىندارىن تاماشالادى. «QymyzFest» قىمىز فەستيۆالى ءوتىپ، جەرگىلىكتى وندىرۋشىلەردىڭ ەڭ ءدامدى، ساپالى قىمىزدارى ۇسىنىلدى. شارانىڭ تارتىمدى تۇسى 600 مىڭ تەڭگە سىيلىق قورى بار «بايگە-2019» ات جارىسى بولدى. وندا شاباندوزدار الامان بايگە، توپ بايگە جانە ەكى قىسقا قاشىقتىققا شابۋ ارقىلى مىقتىلاردى انىقتادى.
شاراعا اقمولا وبلىسى اكىمىنىڭ ورىنباسارى مارات يعاليەۆ قاتىسىپ، كۋرورتتى وڭىردە جازعى ماۋسىمنىڭ اشىلۋىمەن جەرگىلىكتى تۇرعىندار مەن قوناقتاردى قۇتتىقتاپ، جازعى دەمالىستارىن جاقسى وتكىزۋگە تىلەكتەستىگىن ءبىلدىردى.
بۇدان بولەك، «اقمولا بارىسى» قازاق كۇرەسىنەن بەلدەسۋلەر ءوتتى. بوز كىلەمگە وبلىستىڭ ءار وڭىرىنەن جينالعان كىلەڭ مىقتىلار شىعىپ كۇرەستى. جەڭىمپازدار ارنايى ديپلوم جانە اقشالاي سىيلىقتارمەن ماراپاتتالدى. ال، ەڭ ۇزدىك ەكى پالۋان «قازاقستان بارىسى» رەسپۋبليكالىق تۋرنيرىنە قاتىساتىن بولدى.
«بۋراباي دامۋ» سەرىكتەستىگىنىڭ ديرەكتورى رۋسلان ءادىلوۆتىڭ ايتۋىنشا، شارانىڭ ماقساتى، ءوڭىردىڭ باي مادەنيەتىن كورسەتىپ، ۇلتتىق سپورت تۇرلەرىن كەڭىنەن ناسيحاتتاۋ.
«قاتىسۋشىلاردىڭ بارلىعى كوشپەندىلەر الەمىنە ساياحات جاساعانداي بولدى. سالت اتپەن سەرۋەندەپ، ۇلتتىق تاعامداردان ءدام تاتتى جانە ۇلتتىق سپورت تۇرلەرىن تاماشالادى. «جايلاۋ» ەتنواۋىلى تۋريستىك ماۋسىم كەزىندە جۇمىس ىستەيدى. كەيىن جىل بويى جۇمىس ىستەيتىن بولادى» ، دەيدى رۋسلان ءادىلوۆ.
