سامارقاندا قازاق باتىرىنا ەسكەرتكىش قويىلادى - شەتەلدەگى قازاق ءتىلدى ب ا ق- قا شولۋ
ساعاتتىق جىلدامدىعى 600 شاقىرىمدىق پويىز شىعارىلدى - تيانشاننەت
قىتايدىڭ چيڭداۋ قالاسىندا جوعارى جىلدامدىقتى ماگنيتتى قالقىمالى سىناق پويىزىنىڭ ۇلگىسى كوپشىلىككە تانىستىرىلدى.
«مامىردىڭ 23 - كۇنى ساعاتتىق جىلدامدىعى 600 شاقىرىم بولاتىن، ماگنيتتى قالقىمالى سىناق ۇلگىدەگى پويىزدىڭ چيڭداۋ قالاسىندا جاسالعانى ءمالىم بولدى. بۇل ەلىمىزدىڭ جوعارى جىلدامدىقتى ماگنيتتى قالقىما تەحنيكاسى سالاسىندا تىڭ ناتيجەگە قول جەتكىزگەنىن كورسەتەدى» دەپ جازدى «تيانشاننەت» اقپاراتتىق پورتالى.
اتالعان اقپارات كوزىنىڭ مالىمەتىنشە، بۇل جولعى شارا وزىق تەحنيكامەن وندىرىلگەن پويىزدى حالىققا تانىستىرۋ ەكەن.
«ساعاتتىق جىلدامدىعى 600 شاقىرىم بولىپ وتىرعان ماگنيتتى قالقىما سىناق پويىزى ەلىمىزدىڭ وسى سالادا تابىسقا جەتكەنىن ايقىن كورسەتەدى. سىناق ۇلگىسىندەگى بۇل پويىز - جوعارى قارقىندى ماگنيتتى قالقىمالى نىسانىنىڭ ماڭىزدى كورىنىسى. وسى ارقىلى جوعارى جىلدامدىقتاعى كولىكتىڭ تەحنيكاسى مەن جۇيەسىنىڭ بولشەكتەرىن تەكسەرۋگە جانە ساپاسىن ارتتىرۋعا بولادى. ماگنيتتى قالقىما كولىكتىڭ جىلدامدىعى جوعارى، شۋىلى تومەن، تەربەلىسى از، جولاۋشى تاسۋدا قاۋىپسىز. ونىڭ توزىمدىلىگى دە ەرەكشە. ءارى بۇل پويىز ارقىلى تەمىرجول مەن اۋە قاتىناسى اراسىنداعى ايىرماشىلىقتى ءبىرشاما ازايتۋعا بولادى» ، - دەپ جازادى kazakh.ts.cn.
ايتا كەتەيىك، ماگنيتتى قالقىما پويىزدار ماگنيتوپلان نەمەسە ماگليەۆ دەپ اتالادى. ولار بولات جولدارمەن ماگنيتتى ءورىستىڭ كۇشىمەن قوزعالادى. مۇنداي قۇرامدار، ءداستۇرلى پويىزدارمەن سالىستىرعاندا قوزعالىس بارىسىندا رەلستىڭ ۇستىمەن جاناسپايدى. سەبەبى تەمىرجول مەن پويىزدىڭ اراسىندا كەڭىستىك بولادى.
سامارقاندا جالاڭتوس ءباھادۇردىڭ ەسكەرتكىش ءمۇسىنى قويىلادى - « ء و ز ا» اقپاراتتىق اگەنتتىگى
قازاق حالقىنىڭ ءبىرتۋار باتىرى، داڭقتى قولباسشى سامارقان جەرىندە 44 جىل بيلىك ەتكەن جالاڭتوس ءباھادۇر سەيىتقۇل ۇلىنا، ءوزى بيلىك ەتكەن مەكەن سامارقان جەرىندە ەسكەرتكىشى قويىلادى.
بۇل جايىندا سامارقان اكىمىنىڭ ورىنباسارى رۋستام قوبيلوۆتىڭ قاتىسۋىمەن وتكەن باسپا ءسوز ءماسليحاتىندا ايتىلدى، دەپ حابارلايدى وزبەكستاننىڭ « ء و ز ا» مەملەكەتتىك اقپاراتتىق اگەنتتىگى.
سونداي- اق بيىلعى جىلدىڭ 20 - ماۋسىم كۇنى سامارقان قالاسىندا جالاڭتوس ءباھادۇردىڭ اسكەري الەۋەتى جانە باتىردىڭ تاريحي كەزەڭىنە ارنالعان «جالاڭتوس ءباھادۇردىڭ ورتالىق ازيا الەۋمەتتىك- ساياسي جانە مادەني ومىرىندەگى ورنى» تاقىرىبىندا حالقارالىق كونفەرەنتسيا وتكىزىلمەك. ال باتىردىڭ ەسكەرتكىش ءمۇسىنى وسى كوفەرەنتسيا اياسىندا اشىلۋى جوسپارلانىپ وتىرعان كورىنەدى.
«سايىپقىران ءامىر تەمىردەن كەيىن سامارقاننىڭ وركەندەۋىنە سەپتىگى تيگەن باتىردىڭ ءبىرى - جالاڭتوس ءباھادۇر. ول دارىندى قولباسشى عانا ەمەس، ۇلى ساۋلەت ونەرىنىڭ دە قامقورشىسى بولا ءبىلدى. باتىر قازىرگى كۇنى دە سامارقاننىڭ سيمۆولى سانالاتىن رەگيستان الاڭىنداعى ۇلىقبەك مەدرەسەسىنىڭ قاسىنان 1619-1636 -جىلدارى «شيردور» (ارىستان قاقپا) مەدرەسەسىن سالدىرعان. 1646-1660 -جىلى ەكى مەدرەسەنىڭ ورتاسىنان «تيللاكوري» (التىنمەن اپتالعان) مەدرەسەسىنىڭ قۇرىلىسى تىكەلەي جالاڭتوس باتىردىڭ باستاماسىمەن سالىنعان. اتالعان كونفەرەنتسيا اياسىندا «شىعىس ەستراداسى» XII حالقارالىق فەستيۆالىن دە وتكىزۋ جوسپارلانىپ وتىر» دەپ جازدى وزبەكستاندىق باسىلىم.
قىتاي كومپانياسى مىڭ ايەلدى تۇركياعا الىپ كەلدى - TRT
قىتايدىڭ ايگىلى كوسمەتيكا كومپانياسى مىڭ ايەلگە تۇركيا دەمالىسىن سىيلاعان. ءداستۇرلى كيىمدەرىمەن كاپپادوكيا ەلدىمەكەنىنە كەلگەن ايەلدەر پەرى مۇرجالارىن ارالادى. بۇل تۋرالى وسى اپتادا تۇركيانىڭ تەليەۆيزيا جانە راديو مەكەمەسىنىڭ سايتى حابارلادى.
«اۋە جولى ارقىلى ىستانبۇلعا كەلىپ، اۆتوبۋستارمەن كاپپادوكياعا جەتكەن دەلەگاتسيا ءوڭىردىڭ تاريحي جانە تۋريستىك مەكەندەرىن ارالاپ، قىدىردى. گورەمە ايماعىنداعى كىلىچلار سايىنا كەلىپ جەتكەن قىزىل كويلەك كيگەن ايەلدەردىڭ وزدەرى دە تاماشا كورىنىس قالىپتاستىردى» ، دەپ جازادى اتالعان اقپارات كوزى. پەرى مۇرجالارى جانە تابيعي جارتاستار اراسىندا قىدىرعان قىتايلىق تۋريستەر كەيىننەن قىتاي تىلىندە جازىلعان قاعازبەن بىرگە سۋرەتكە ءتۇستى.
ىستانبۇل، كاپپادوكيا، انتاليا جانە پامۋككالەنى قامتىعان ءبىر اپتالىق ساياحاتتان كەيىن ەلدەرىنە ورالاتىن تۋريستەر تۇركيانىڭ تاريحي جانە مادەني جادىگەرلەرىنە ءتانتى بولدى، دەيدى TRT.
قۇدىس شەرۋى يراننىڭ 950 قالاسىندا وتەدى - «فارس» اقپارات اگەنتتىگى
يراننىڭ يسلامدىق ۇگىت- ناسيحات كەڭەسىنىڭ قۇدىس جانە ينتەفازا شتابىنىڭ باسشىسى بيىل دۇنيەجۇزىلىك قۇدىس كۇنىنە ارنالعان شەرۋلەردىڭ يران يسلام رەسپۋبليكاسىنىڭ 950 قالاسىندا وتەتىنى تۋرالى حابارلادى. بۇل جايىندا وسى اپتادا «رarstoday» اقپارات اگەنتتىگى مالىمدەدى.
يراننىڭ يسلامدىق ۇگىت- ناسيحات كەڭەسىنىڭ قۇدىس جانە ينتەفازا شتابىنىڭ باسشىسى رامازان شاريف باسپا ءسوز جيىنىندا، بيىلعى دۇنيەجۇزىلىك قۇدىس كۇنى ەلدىڭ تۇكپىر- تۇكپىرىندە اتالىپ وتەتىنىن ايتقان.
«بۇل كۇنگە بايلانىستى شەرۋلەر 40 جىل بويى جالعاسىپ كەلە جاتقانداي، دۇنيەجۇزىلىك قۇدىس كۇنىنە قاتىستى بولادى. قاسيەتتى رامازان ايىنىڭ سوڭعى جۇماسىندا، يراننىڭ تۇكپىر- تۇكپىرىندە وتەدى» ، - دەگەن ول.
ي ي ر ىرگەتاسىن قالاۋشىسى يمام حومەينيدىڭ ۇسىنىسىمەن قاسيەتتى رامازان ايىنىڭ سوڭعى جۇماسى «دۇنيەجۇزىلىك قۇدىس كۇنى» دەپ اتالعان بولاتىن.
باركولدە مىڭ ادام قاتىسقان ۆەلوسيپەد جارىسى ءوتتى - تيانشاننەت
شىنجاڭنىڭ قۇمىل ايماعىنا قاراستى باركول قازاق اۆتونوميالى اۋدانى - عاجايىپ تابيعاتىمەن الىس جاقىننان كەلگەن تۋريستەردى وزىنە باۋرايتىن شۇرايلى مەكەن. وسى اپتانىڭ باسىندا سول اۋدانداعى كورىكتى ورىنداردىڭ ءبىرى «باركول كولى» ماڭىندا مىڭ ادامدىق اۋەسقوي سپورتشىلاردىڭ ۆەلوسيپەد جارىسى ءوتتى. بۇل تۋرالى «تيانشاننەت» اقپاراتتىق پورتالى مالىمدەگەن بولاتىن.
بۇل شارانىڭ ءوتۋى «قىتاي ساياحات كۇنى» دەپ اتالاتىن مەملەكەتتىك مەرەكەگە تۇسپا- تۇس كەلىپ وتىر. جارىسقا قۇمىل، ءۇرىمجى، سانجى سەكىلدى الىس جەرلەردەن كەلگەن ۆەلوسيپەد اۋەسكەرلەرى دە قاتىسقان.
