ەلوردادا مەرەكە كۇنى بالالاردى قانداي شارالارعا اپارۋعا بولادى

نۇر- سۇلتان. قازاقپارات - ەلوردادا حالىقارالىق بالالاردى قورعاۋ كۇنىنە وراي قالانىڭ كىشكەنتاي تۇرعىندارىنا ارناپ قىزىقتى مەرەكەلىك باعدارلاما ازىرلەندى، دەپ حابارلايدى قازاقپارات.

نۇر- سۇلتان قالاسىنىڭ مادەنيەت جانە سپورت باسقارماسى قالانىڭ مادەنيەت جانە سپورت ۇيىمدارىندا وتەتىن مەرەكەلىك شارالار باعدارلاماسىن ۇسىنادى.

 ءتۇرلى ويىن- ساۋىقتار بالالارعا دا، ەرەسەكتەرگە دە كوتەرىڭكى كوڭىل- كۇي سىيلايدى.

1 - ماۋسىمدا استانالىق سيرك «شاتتىق شەڭبەرى» شوۋ باعدارلاماسىن تاماشالاۋعا شاقىرادى. ەكى ساعاتتىق شارا بارىسىندا اۋە گيمناستتارى، اكروباتتار، ۆيرتۋوز جونگلەرلەر، ەكۆيليبريستەر ونەر كورسەتىپ، ۇيرەتىلگەن يتتەر مەن ەشكىلەر، ەكزوتيكالىق قۇستار، كوڭىلدى كلوۋندار جانە ت. ب. كورۋگە بولادى.

 قويىلىم ساعات 16.00 دە باستالادى، كىرۋ - تەگىن.

وسى كۇنى م. گوركي اتىنداعى مەملەكەتتىك اكادەميالىق ورىس دراما تەاترىنىڭ ۇجىمى كىشكەنتاي كورەرمەندەرىن قۇتتىقتايدى.

ساعات 11.00 دە ورتالىق مادەنيەت جانە دەمالىس ساياباعىندا س. استراحانتسيەۆتىڭ «براتەتس ليس ي براتەتس كروليك» ەرتەگىسى كورسەتىلدى.

استانالىق قۋىرشاق تەاترى مەرەكە كۇنى ن. گەرنەت «ۆولشەبنايا لامپا الاددينا» پەساسىن قويادى. قويۋشى- رەجيسسەرى - م. تاشپەنوۆ.

 قويىلىم 1 جانە 2 ماۋسىمدا ساعات 14.00 دە قازاق تىلىندە، ال ساعات 12.00 مەن 16.00 دە ورىس تىلىندە كورەرمەن نازارىنا ۇسىنىلادى.

نۇر- سۇلتان قالاسىنىڭ مەملەكەتتىك اكادەميالىق فيلارمونياسىنىڭ دا كىشكەنتاي استانالىقتارعا ارنالعان تارتۋى بار.

 سونىمەن قاتار، ەلوردادا بالالاردى قورعاۋ كۇنىنە وراي «بالا تىلەگى» مەرەكەلىك كونتسەرتى ۇيىمداستىرىلادى، وندا كلاسسيكالىق، ەسترادالىق ۆوكال سوليستەرى، «قورقىت» ءداستۇرلى مۋزىكا توبى، «شالقىما» حالىق ءبيى ءانسامبلى، «الەم» ەسترادالىق بي ءانسامبلى ونەر كورسەتەدى. كونسەرتتىڭ باستالۋى ساعات 17.00 دە. بيلەتتىڭ قۇنى - 1000 تەڭگە.

 بالالار مەرەكەسىنە ارنالعان ەكىنشى كونسەرت 2 - ماۋسىمدا ساعات 19.00 دە وتەدى. جينالعان قاۋىم سيمفونيالىق وركەستردىڭ ورىنداۋىنداعى «ۇزدىك Disney جانە DreamWorks مۋزىكالارىن» تىڭداي الادى. بيلەت قۇنى - 3500 تەڭگە.

 1 - ماۋسىمدا «ناز» مەملەكەتتىك بي تەاترى بالعىندارعا ارناپ ويىن- ساۋىق باعدارلاماسىن وتكىزەدى، ءتۇرلى بايقاۋلار وتكىزىپ، سىيلىقتار تارتۋ ەتەدى، «بار مەيىرىمىز بالالارعا!» اتتى مەرەكەلىك كونسەرت ۇيىمداستىرادى.

 سونىمەن قاتار، وسى كۇنى «ماڭگىلىك ەل» قاقپاسىنىڭ اركاسىندا «ماما، پاپا! وبراتيتە نا مەنيا ۆنيمانيە!» تاقىرىبىندا بالالار سۋرەت كورمەسىنىڭ تۇساۋكەسەرى وتەدى. شارا بارىسىندا «گولوسوك» مۋزىكالىق دامۋ ستۋدياسىنىڭ شاكىرتتەرى ونەر كورسەتەدى، سونداي- اق مەرەكەلىك فۋرشەت ۇيىمداستىرىلادى. كىرۋ تەگىن.

جازدىڭ العاشقى كۇندەرى، 1-2 - ماۋسىمدا، جىل سايىنعى «ءبارى ءان سالادى!» كاراوكە چەمپيوناتىنىڭ 1- كەزەڭى وتەدى. ۆوكالدىق سايىس ەسىل وزەنىنىڭ جاعاسىندا امفيتەاتردىڭ ساحناسىندا وتەدى. بيىلعى چەمپيونات قازاقستانداعى جاستار جىلىنا ورايلاستىرىلعان.

1 - ماۋسىمدا بالالار اراسىندا تىڭداۋ وتەدى. جاس ورىنداۋشىلار پەداگوگتارىمەن بىرگە دايىندىق ۇستىندە. ۇيىمداستىرۋشىلار قاتىسۋشىلارعا مۋلتفيلمدەردىڭ ساۋندترەكتەرىنەن باستاپ الەمدىك حيتتەرگە دەيىن اندەردىڭ مول تاڭداۋىن ۇسىنىپ وتىر.

 2 - ماۋسىمدا ساحناعا ەرەسەكتەر شىعادى. مەرەكە كۇندەرى سپورتتىق جارىستار دا ۇيىمداستىرىلادى.

1 - جانە 2 - ماۋسىمدا «الاۋ» مۇز ايدىنى سارايىندا العاش رەت وبىر اۋىرىنان جازىلعان جانە ورگاندار ترانسپلانتاتسياسى جاسالعان بالالار اراسىنداعى رەسپۋبليكالىق ويىندار وتكىزىلەدى.

شاعىن- فۋتبول، ۇستەل تەننيسى، جەڭىل اتلەتيكا (60 م جۇگىرۋ) ، پنيەۆماتيكالىق ۆينتوۆكادان اتۋ، شاحمات، ۇلتتىق ويىن اسىق اتۋدان جارىستار وتكىزىلىپ، ۇزدىكتەر انىقتالادى.

 شاراعا 3 جاستان 18 گە دەيىنگى 100 گە جۋىق بالا قاتىسادى دەپ كۇتىلۋدە.

بالالاردى قورعاۋ كۇنى ق. مۇڭايتپاسوۆ ستاديونىندا مەكتەپكە دەيىنگى جاستاعى بالالار اراسىندا «بەگوۆەل» ۆەلومارافونى وتەدى. ماقسات - بالالاردى ەرتە جاستان سپورتقا تارتۋ.

سونىمەن قاتار، 1 - ماۋسىمدا، ەلوردالىق ساياباقتاردا بالالار ويىن- ساۋىق باعدارلاماسى وتكىزىلەدى. «ساياباقتىڭ 7 عاجايىبى» ءۇش جىلدان بەرى كىشكەنتاي ەلوردا تۇرعىندارى مەن قوناقتارىنا قۋانىش سىيلاپ كەلەدى. بالالاردىڭ سۇيىكتى كەيىپكەرلەرىنىڭ كەيپىندەگى انيماتورلاردىڭ قاتىسۋىمەن وتكىزىلەتىن شوۋ استانالىق، جەرۇيىق جانە جەتىسۋ ساياباقتارىندا وتكىزىلەدى.

 سەرۋەندەپ جۇرگەن بالدىرعاندارعا مينوندار، قۋىرشاق باربيلەر، ماداگاسكار جانە سپانچ- بوب جانە باسقا دا مۋلتفيلمدەردىڭ كەيىپكەرلەرى كوتەرىڭكى كوڭىل- كۇي سىيلايدى.

«ساياباقتىڭ 7 عاجايىبى» شوۋ باعدارلاماسىنىڭ كەستەسى نۇر- سۇلتان قالاسىنىڭ مادەنيەت جانە سپورت باسقارماسىنىڭ @madeniet_sport.nursultan Instagram اككاۋنتىندا جاريالانادى.