ميۋنحەندە دۇنيەجۇزى قازاقتارىنىڭ كىشى قۇرىلتايى وتەدى
جىل سايىن بۇل ءىس- شارا ەتنيكالىق قازاقتار كوپ تۇراتىن ەلدەردە وتكىزىلەدى. قازىرگى ۋاقىتتا گەرمانيادا ەۋروپاداعى ەڭ كوپ قازاق دياسپوراسى - 3 مىڭ ادام (شامامەن 250 وتباسى) تۇرادى. بۇل تۋرالى «وتانداستار قورى» باسپا ءسوز قىزمەتىنەن حابارلاندى.
ءىس- شارانىڭ نەگىزگى ماقساتى - مادەني- گۋمانيتارلىق جانە الەۋمەتتىك- ەكونوميكالىق جوبالار نەگىزىندە قازاق دياسپوراسىنىڭ وكىلدەرىن بىرىكتىرۋ.
كىشى قۇرىلتايدىڭ جۇمىسىنا قازاق دياسپوراسىنىڭ 100 دەن استام وكىلى، سونداي- اق، قازاقستاننىڭ مادەنيەت قايراتكەرلەرى، كاسىپكەرلەر، دۇنيەجۇزى قازاقتارى قاۋىمداستىعىنىڭ وكىلدەرى، «وتانداستار» قورىنىڭ ماماندارى مەن ساراپشىلارى قاتىسادى.
كىشى قۇرىلتايداعى نەگىزگى تاقىرىپ قازاقستان رەسپۋبليكاسىنىڭ تۇڭعىش پرەزيدەنتى - ەلباسىنىڭ «ۇلى دالانىڭ جەتى قىرى» ماقالاسى مەن «رۋحاني جاڭعىرۋ» باعدارلاماسىنىڭ ەرەجەلەرى كونتەكستىندە ىنتىماقتاستىقتى دامىتۋ بولىپ تابىلادى. شارا ياسىندا الەمنىڭ ءتۇرلى ەلدەرىندەگى قازاق دياسپوراسىنىڭ ىنتىماقتاستىعىن دامىتۋدىڭ وزەكتى ماسەلەلەرىن تالقىلاۋ، «وتانداستار» قورى مەن دۇنيەجۇزى قازاقتارى قاۋىمداستىعى باستاماشىلىق ەتكەن بىرلەسكەن باعدارلامالار مەن جوبالاردى جۇزەگە اسىرۋ جوسپارلانۋدا.
كۇن تارتىبىندە شەتەلدە تۇراتىن وتانداستاردى قولداۋ ءۇشىن نورماتيۆتىك بازانى جەتىلدىرۋ، ءبىلىم، تۋريستىك باعدارلامالارىن ىسكە اسىرۋ، قازاق ءتىلىن دامىتۋ، بايلانىس ورناتۋ جانە بيزنەس- جوبالاردى جۇزەگە اسىرۋ سەكىلدى ماسەلەلەر تالقىلاناتىن بوللادى.
قۇرىلتايدىڭ سپيكەرلەرى قازاقستاننىڭ گەرمانياداعى ەلشىسى بولات ءنۇسىپوۆ، دۇنيەجۇزى قازاقتارى قاۋىمداستىعى ءتوراعاسىنىڭ ءبىرىنشى ورىنباسارى زاۋىتبەك تۇرىسبەكوۆ، «حالىقارالىق باعدارلامالار ورتالىعى» ا ق پرەزيدەنتى جانبولات مەلدەشوۆ، «وتانداستار» قورىنىڭ ۆيتسە- پرەزيدەنتى ماعاۋيا سارباسوۆ، شۆەتسياداعى قازاقتار قاۋىمداستىعىنىڭ ءتوراعاسى مۇرات ەرميش بولادى.
قۇرىلتاي قورىتىندىسى بويىنشا شۆەتسيادا، ۇلىبريتانيادا، گەرمانيادا، فرانسيادا، دانيادا، نيدەرلاندىدا، اۆستريادا جانە بەلگيادا جۇمىس ىستەيتىن قازاق مادەني ورتالىقتارىمەن «وتانداستار» قورىنىڭ ىنتىماقتاستىعى جانە ارىپتەستىگىن دامىتۋ تۋرالى ەكى جاقتى مەموراندۋمعا قول قويىلماق.
بۇدان بولەك، قۇرىلتاي شەڭبەرىندە «قازاق ءۇيى» - ورتاق برەندىمەن الەمنىڭ ءتۇرلى ەلدەرىندە جۇمىس ىستەيتىن بارلىق قازاق مادەنيەت ورتالىقتارىنىڭ ءبىرىڭعاي بازاسىنا بىرىكتىرۋگە باعىتتالعان جوبا باستالماق.
سونداي- اق، قۇرىلتاي شەڭبەرىندە قازاقستاندىق دەلەگاتسيا شەتەلدەگى قازاق دياسپوراسى وكىلدەرىنىڭ اراسىنداعى جاستارمەن كەزدەسىپ، قازاقستاندىق جوعارى وقۋ ورىندارىنىڭ ءبىلىم بەرۋ كورمەسىن وتكىزەدى. كورمە جۇمىسىنا نازاربايەۆ ۋنيۆەرسيتەتىنىڭ، سۇلەيمەن دەميرەل اتىنداعى ۋنيۆەرسيتەتتىڭ جانە سەمەي قالاسىنىڭ شاكارىم اتىنداعى مەملەكەتتىك ۋنيۆەرسيتەتىنىڭ وكىلدەرى قاتىسادى. كورمە اياسىندا قازاقستاننىڭ جوعارى وقۋ ورىندارىندا وقۋ مۇمكىندىكتەرى تانىستىرىلادى جانە شەتەلدىك ۋنيۆەرسيتەتتەرمەن ىنتىماقتاستىق جوبالارى ۇسىنىلادى.
سونىمەن قاتار، قۇرىلتاي اياسىندا العاش رەت وتاندىق جانە شەتەلدىك كاسىپكەرلەردىڭ قاتىسۋىمەن بيزنەس- فورۋم وتەدى. بيزنەس- فورۋم شاعىن جانە ورتا كاسىپكەرلىكتى دامىتۋدىڭ ءتۇرلى سالالارىندا تاجىريبە الماسۋعا، قازاقستان، گەرمانيا جانە ەۋروپا مەن ازيانىڭ باسقا دا ەلدەرىنىڭ كاسىپكەرلەرى اراسىنداعى بايلانىستاردى كەڭەيتۋگە مۇمكىندىك بەرەدى.
تۇتاستاي العاندا قازاقتاردىڭ كىشى قۇرىلتايىن وتكىزۋ جاڭا سەرىكتەستەردى ىزدەۋ، ىسكەرلىك جانە گۋمانيتارلىق بايلانىستار ورناتۋ، شەتەلدىك قوعامداستىققا قازاقستان رەسپۋبليكاسىنىڭ ءتۇرلى سالالارىنداعى مۇمكىندىكتەرىن كورسەتۋ ءۇشىن ءتيىمدى الاڭدى قامتاماسىز ەتەدى.
