تۇركىستاندا «ءنازىر جولى» اتتى كىتاپتىڭ تۇساۋى كەسىلدى
اتالعان باسقوسۋعا بەلگىلى عالىمدار مەن زيالى قاۋىم وكىلدەرى قاتىستى، دەپ حابارلايدى قازاقپارات.
جيىندا ءنازىر تورەقۇلوۆ مۋزەيىنىڭ مەڭگەرۋشىسى باقىتجان جورابەكوۆ ءىس-شارانىڭ ماڭىزىنا توقتالىپ، ەل ءۇشىن شەيىت بولعان قايراتكەرلەردى ۇلىقتاۋ ماقساتىندا كوپتەگەن جۇمىستار قولعا الىنعانىن ايتتى.
بەلگىلى ءنازىرتانۋشى، اقىن، تۇركىستان قالاسىنىڭ قۇرمەتتى ازاماتى نۇرماحان نازاروۆ جازىقسىز جالا قۇربانى بولعان ءنازىر تورەقۇلوۆ جايىندا كەڭىنەن ايتا كەلە، تۇلعا تۋرالى رەسەي مەن وزبەكستان باسىلىمدارىندا جارىق كورگەن ماقالالاردان مىسال كەلتىردى. كەيىنگى ۇرپاق ونداي زوبالاڭدى كورمەسىن دەگەن تىلەگىن جەتكىزدى. ال اقىن-جازۋشى ايىپبەرگەن بالتابايەۆ مۋزەيگە ءوز كىتاپتارىن تارتۋ ەتتى.
باسقوسۋدا ابدوللا ءجۇسىپوۆ، حازىرەتالى تۇرسىن، سەيدوللا سادىق ۇلى سىندى عالىمدار مەن تاريحشىلار ساياسي- قۋعىن سۇرگىن قۇربانى بولعان الاش ارداقتىلارى جايىندا ءسوز قوزعادى. ساياسي قۋعىن- سۇرگىن مەن اشارشىلىق قۇرباندارى تۋرالى دەرەكتەر جىلدان-جىلعا تولىعىپ جاتقانىنا، وسى باعىتتاعى جۇمىستاردى جانداندىرۋ كەرەكتىگىنە توقتالدى. مۋزەي جاناشىرلارى ءتولتاي تولەگەنوۆ، ءالي نىشانوۆ جانە تىنىسباي امەت ۇلى دا ءوز ويلارىن ورتاعا سالدى.
«قازاق تاريحىنداعى سول ءبىر زۇلمات جىلدارى ميلليونداعان قانداسىمىز اشتىقتان قىرىلسا، قايراتكەرلەرىمىز ۇلتىنا قىزمەت ەتكەنى ءۇشىن جازالاندى. ءبىز وسى قيىن- قىستاۋ كەزەڭدە قازاقتى امان ساقتاپ قالۋ جولىندا ەڭبەك ەتىپ، شەيىت بولعان تۇلعالارىمىزدى ۇمىتپاي، ولاردىڭ ەرلىكتەرىن جاس ۇرپاققا دارىپتەۋىمىز كەرەك»، - دەدى ەل اعالارى.
«دوڭگەلەك ۇستەلدە» «ءنازىر جولى» اتتى كىتاپتىڭ تۇساۋى كەسىلدى. ونى حالىقارالىق ء«نازىر تورەقۇلوۆ» قورىنىڭ قولداۋىمەن ن. تورەقۇلوۆ مۋزەيىنىڭ قىزمەتكەرلەرى ازىرلەگەن تۋىندىدا قازاقتان شىققان تۇڭعىش ديپلومات ءنازىر تورەقۇلوۆ تۋرالى زەرتتەۋ ماقالالار مەن عالىمداردىڭ باياندامالارى توپتاستىرىلعان.
كەزدەسۋ سوڭىندا ساياسي قۋعىن-سۇرگىن جانە اشارشىلىق قۇرباندارىنا، الاش ارىستارىنىڭ رۋحتارىنا قۇران باعىشتالدى.