بۇگىن «حابار» ارناسىندا پرەزيدەنتتىككە كانديداتتاردىڭ تەلەدەباتى وتەدى
بۇعان دەيىن ق ر ورتالىق سايلاۋ كوميسسياسى سايلاۋ الدىنداعى تەليەۆيزيالىق پىكىرتالاس پەن پىكىرسايىستى جۇرگىزۋ ءتارتىبىن كوزدەيتىن رەگلامەنت ازىرلەگەن بولاتىن. ول رەگلامەنت بويىنشا، تەلەپىكىرتالاس 3 راۋندقا بولىنگەن.
ءبىرىنشى راۋندتىڭ تاقىرىبى - «قازاقستاننىڭ ەكونوميكالىق دامۋ باسىمدىقتارى» . ونىڭ ءوزى 2 تۋردى قامتيدى. ءبىرىنشى تۋردا ءاربىر قاتىسۋشى ءوزىنىڭ سايلاۋ الدىنداعى باعدارلاماسىن تانىستىرسا، ەكىنشى تۋردا كانديداتتار «سۇراق- جاۋاپ» تۇرىندە پىكىرسايىسقا تۇسەدى. مۇندا ولار وپپونەنتتەرىنە ەكى سۇراقتان قويىپ، ءوزى دە ەكى سۇراققا جاۋاپ بەرۋى ءتيىس.
ەكىنشى راۋندتىڭ تاقىرىبى - «قازاقستاننىڭ الەۋمەتتىك جاڭعىرۋى» . راۋندتىڭ ءبىرىنشى تۋرىندا قاتىسۋشىلار بەرىلگەن تاقىرىپ بويىنشا ءسوز سويلەپ، ەكىنشى تۋردا جۇرگىزۋشىلەردىڭ سۇراعىنا جاۋاپ بەرۋى ءتيىس.
ءۇشىنشى راۋندتىڭ تاقىرىبى - «سايلاۋشىلارعا ارناۋ» . بۇل قورىتىندى راۋندتا قاتىسۋشىلار ەكران ارقىلى سايلاۋشىلارعا ارناپ ءسوز سويلەيدى.
ەسكە سالساق، ورتالىق سايلاۋ كوميسسياسى قازاقستان رەسپۋبليكاسى پرەزيدەنتتىگىنە 7 كانديداتتى تىركەگەن بولاتىن. ولار: «ۇلى دالا قىراندارى» رەسپۋبليكالىق قوعامدىق مادەني- الەۋمەتتىك بىرلەستىگىنەن سادىبەك تۇگەل، «Nur Otan» پارتياسىنان قاسىم- جومارت توقايەۆ، «ق ر كاسىپوداقتار فەدەراتسياسى» رەسپۋبليكالىق كاسىپوداقتار بىرلەستىگىنەن امانگەلدى تاسپيحوۆ، «اق جول» قازاقستاننىڭ دەموكراتيالىق پارتياسىنان دانيا ەسپايەۆا، «اۋىل» حالىقتىق- دەموكراتيالىق پاتريوتتىق پارتياسىنان تولەۋتاي راقىمبەكوۆ، قازاقستاننىڭ كوممۋنيستىك حالىق پارتياسىنان جامبىل احمەتبەكوۆ جانە «ۇلت تاعدىرى» رەسپۋبليكالىق قوعامدىق بىرلەستىگىنەن ءامىرجان قوسانوۆ.