ەلشى قازاقستان- قىتاي اراسىنداعى ستاتيستيكالىق ايىرماشىلىقتى ءتۇسىندىردى

نۇر- سۇلتان. قازاقپارات - ق ح ر- دىڭ ەلىمىزدەگى توتەنشە جانە وكىلەتتى ەلشىسى جاڭ شياۋ قازاقستان مەن قىتاي اراسىنداعى ساۋدا اينالىمى بويىنشا ستاتيستيكالىق دەرەكتەردىڭ ايىرماشىلىعىنا قاتىستى تۇسىنىك بەردى، دەپ حابارلايدى قازاقپارات ءتىلشىسى.

«ەكى ەل ستاتيستيكالىق مالىمەتتەرى بويىنشا نەلىكتەن وسىنداي ايىرماشىلىق بولدى؟ شىن مانىندە بۇل سالاداعى كورسەتكىشتەر بويىنشا تاڭعالاتىن ەشتەڭە دە جوق، سەبەبى بارلىق ەلدەر اراسىندا وسىنداي ايىرماشىلىقتار ورىن الىپ جاتادى» ، - دەدى جاڭ شياۋ قازاقستان- قىتاي قارىم- قاتىناستارىنا ارنالعان شارادا.

ديپلوماتتىڭ سوزىنە قاراعاندا، بۇگىندە ەكى ەلدىڭ ءتيىستى ورگاندارى وسىنداي ايىرماشىلىقتاردى بارىنشا ازايتۋ بويىنشا جۇمىستاردى جۇرگىزۋدە.

«مۇنداي ايىرماشىلىقتى بارىنشا تومەندەتۋ ءۇشىن ەكى ەلدىڭ كەدەندىك قىزمەتتەرى ۇكىمەتتەردىڭ تاپسىرماسى بويىنشا قاجەتتى شارالاردى ىسكە اسىرۋدا» ، - دەدى ەلشى.