پرەزيدەنتتىككە ۇمىتكەرلەردىڭ ناۋقانعا ءوز قالتاسىنان قانشا قارجى شىعىنداي الاتىنىن زاڭگەرلەر ايتتى

نۇر-سۇلتان. قازاقپارات - ەلوردادا «زاڭگەرلەر - ءادىل سايلاۋ ءۇشىن» رەسپۋبليكالىق قوعامدىق بىرلەستىگى باسپا ءسوز ءماسليحاتىن وتكىزدى، دەپ حابارلايدى قازاقپارات ءتىلشىسى.

بىرلەستىك وكىلى، پروفەسسور مارات سارسەمبايەۆ پرەزيدەنتتىككە ۇمىتكەرلەردىڭ سايلاۋ ناۋقانىنا قارجى شىعىنداۋ بويىنشا قانداي شەكتەۋلەر قويىلاتىنىن اتادى.

«ەگەر پرەزيدەنتتىككە كانديدات ءوزىنىڭ قارجىنا ءىس-شارالار وتكىزەتىن بولسا، شىعارىلاتىن ماتەريالدار سانىنا، وتكىزىلەتىن ءىس-شارالارعا ارنايى شەكتەۋلەر جوق. ءبىراق جالپى قارجى كولەمى بويىنشا بەلگىلى ءبىر شەكتەۋلەر بار. سايلاۋ تۋرالى كونستيتۋتسيالىق زاڭعا سايكەس، كانديداتتىڭ ناۋقانعا شىعىندايتىن ءوز قاراجاتى نەمەسە ۇسىنعان رەسپۋبليكالىق قوعامدىق بىرلەستىك بولگەن قاراجات 510 ميلليون تەڭگەدەن اسپاۋى كەرەك. بۇل ەڭ تومەنگى ەڭبەكاقى مولشەرىنىڭ 12 مىڭ ەسەسىنە تەڭ. ال ەل ازاماتتارى مەن ۇيىمدارى كانديداتتىڭ سايلاۋ ناۋقانىن ەرىكتى قايىرمالدىق نەگىزىندە قارجىلاندىرسا، جالپى سوما ەڭ تومەنگى ەڭبەكاقى مولشەرىنىڭ 15 مىڭ ەسەسىنەن اسپاۋى كەرەك. بۇل اقشاعا شاققاندا 637,5 ميلليون تەڭگە» - دەيدى مارات سارسەمبايەۆ.

زاڭگەردىڭ ايتۋىنشا، رەسپۋبليكالىق بيۋدجەت ەسەبىنەن جابىلاتىن 7331200 تەڭگەنىڭ شىعىسى تومەندەگى شەڭبەردەن شىقپاۋى ءتيىس.

«كانديدات سايلاۋالدى باعدارلاماسىن تەلەديدار ارقىلى بايانداۋعا 5250000 تەڭگەدەن ارتىق شىعىنداي المايدى. ال راديو ارقىلى بايانداۋ 200 مىڭ تەڭگەدەن اسپاۋى ءتيىس. مەرزىمدى باسپا نەمەسە جەلىلىك باسىلىمدارعا جاريالاۋ كولەمى 810 مىڭ تەڭگەدەن ارتىلماۋى قاجەت»، - دەيدى «زاڭگەرلەر - ءادىل سايلاۋ ءۇشىن» رەسپۋبليكالىق قوعامدىق بىرلەستىگىنىڭ وكىلى.