سايلاۋالدى تەلەۆيزيالىق پىكىرتالاس تىكەلەي ەفيردە وتەدى
ق ر ورتالىق سايلاۋ كوميسسياسى بەكىتكەن رەگلامەنتكە سايكەس، تەلەۆيزيالىق جارىسءسوز جانە پىكىرتالاس 3 راۋندقا بولىنگەن.
ءبىرىنشى راۋند «قازاقستاننىڭ ەكونوميكالىق دامۋىنىڭ باسىمدىقتارى» تاقىرىبىندا وتكىزىلمەك. سايلاۋالدى تەلەۆيزيالىق پىكىرتالاستىڭ راۋندى ەكى تۋردى قامتيدى. العاشقى تۋردا ءوزىنىڭ سايلاۋالدى باعدارلاماسىن تانىستىرۋ ماقساتىندا ءاربىر قاتىسۋشىعا ءسوز بەرىلەدى.
ەكىنشى تۋردا قاتىسۋشىلاردىڭ وزدەرىنىڭ وپپونەتتەرىنە «سۇراق- جاۋاپ» تارتىبىندە پىكىرتالاس سەسسياسى ۇيىمداستىرىلماق. قاتىسۋشىلار ءوزىنىڭ وپپونەنتتەرىنە ەكى سۇراقتان قويادى، سونداي- اق ەكى سۇراققا جاۋاپ بەرۋ مۇمكىندىگىن الادى.
ەكىنشى راۋند «قازاقستاننىڭ الەۋمەتتىك جاڭعىرۋى» تاقىرىبىنا ارنالماق. وسى راۋندتىڭ ءبىرىنشى تۋرىندا قاتىسۋشىلار بەرىلگەن تاقىرىپ بويىنشا ءسوز سويلەيدى. ەكىنشى تۋردا جۇرگىزۋشىلەردىڭ بارلىق قاتىسۋشىلارعا ءبىر سۇراق قويۋى ەسكەرىلگەن.
ءۇشىنشى راۋندتىڭ تاقىرىبى - «سايلاۋشىلارعا ارناۋ» . ءۇشىنشى، قورىتىندى راۋندتا قاتىسۋشىلار تىكەلەي سايلاۋشىلارعا ارناپ ءسوز سويلەيدى. ءتۇسىرىلىم «قازمەديا ورتالىعى» مەدياكەشەنىندە ۇيىمداستىرىلادى. پىكىرتالاستى تانىمال تەلەجۇرگىزۋشىلەر ەرلان يگىسىنوۆ پەن قىمبات دوسجان جۇرگىزەدى.
ەسكە سالساق، قر پرەزيدەنتتىگىنە كانديداتتاردىڭ تەلەدەباتى 29 - مامىردا «حابار» ارناسىندا وتەتىندىگىن بۇعان دەيىن حابارلاعان بولاتىنبىز.
اۆتور: رۋسلان عابباسوۆ