قازاقستاندىق دەلەگاتسيا ۇ ق ش ۇ سىرتقى ىستەر مينيسترلەرى كەڭەسىنىڭ وتىرىسىنا قاتىستى

نۇر-سۇلتان. قازاقپارات - قازاقستاننىڭ سىرتقى ىستەر ءمينيسترى بەيبىت اتامقۇلوۆ ۇجىمدىق قاۋىپسىزدىك تۋرالى شارت ۇيىمى (ۇ ق ش ۇ) سىرتقى ىستەر مينيسترلەرى كەڭەسىنىڭ وتىرىسىنا قاتىستى.

بۇل تۋرالى ق ر سىرتقى ىستەر مينيسترلىگىنىڭ باسپا ءسوز قىزمەتى حابارلادى.

كەزدەسۋ بارىسىندا ۇ ق ش ۇ- عا مۇشە مەملەكەتتەردىڭ سىرتقى ساياسي ۆەدومستۆولارىنىڭ باسشىلارى حالىقارالىق جانە وڭىرلىك جاعداي ماسەلەلەرى بويىنشا پىكىر الماستى، سونداي-اق ۇيىم قىزمەتىنىڭ اعىمداعى جاعدايى مەن دامۋ پەرسپەكتيۆالارىن تالقىلاپ، وزەكتى سىن-قاتەرلەر مەن قاۋىپتەرگە قارسى ءىس-قيمىل شارالارىنىڭ كەڭ اۋقىمىن قارادى.

قازاقستان س ءى م باسشىسى ءوز سوزىندە ءىس-شاراعا قاتىسۋشىلاردىڭ نازارىن قازاقستاننىڭ تۇڭعىش پرەزيدەنتى - ەلباسى نۇرسۇلتان نازاربايەۆتىڭ سەنىمدى نىعايتۋ جانە حالىقارالىق شيەلەنىستى باسەڭدەتۋ جولدارىن ىزدەۋ ماقساتىندا جەتەكشى الەمدىك دەرجاۆالار مەن حالىقارالىق ۇيىمدار اراسىنداعى ديالوگتى دامىتۋدى قاراستىراتىن «ءۇش د» جاڭا گەوساياسي شىندىق تۋرالى باستاماسىنا اۋداردى.

ۇ ق ش ۇ ۇجىمدىق قاۋىپسىزدىك كەڭەسىنىڭ سەسسياسىنا دايىندىق شەڭبەرىندە سىرتقى ىستەر مينيسترلەرى تاجىك-اۋعان شەكاراسىنداعى ىقتيمال شيەلەنىستى ازايتۋ جونىندەگى شارالار پاكەتىن، 2019-2021-جىلدارعا ارنالعان ب ۇ ۇ- نىڭ جاھاندىق تەرروريزمگە قارسى ستراتەگياسىن ىسكە اسىرۋ جونىندەگى ۇ ق ش ۇ ەلدەرىنىڭ ۇجىمدىق ءىس-قيمىل جوسپارىن جانە ۇ ق ش ۇ داعدارىستىق ارەكەت ەتۋ ورتالىعىنىڭ اقپاراتتىق ءوزارا ءىس-قيمىل رەگلامەنتىن ماقۇلدادى.

سىرتقى ساياسي ۆەدومستۆولاردىڭ باسشىلارى 2019 جىلعا ارنالعان بىرلەسكەن وتىنىشتەر تىزبەسىن، سونداي-اق ۇيىم قىزمەتىنىڭ بارلىق باعىتتارى بويىنشا ساراپشىلاردىڭ جىل سايىنعى كەڭەس بەرۋ جوسپارىن بەكىتتى.

وتىرىس قورىتىندىسى بويىنشا، سونداي-اق ناتوعا مۇشە مەملەكەتتەردىڭ س ءى م باسشىلارىنا ىنتىماقتاستىقتى دامىتۋ جانە ءوزارا سەنىمدى نىعايتۋ تۋرالى ۇسىنىستارمەن اشىق ۇندەۋ قابىلداندى. قۇجاتتا باعالاۋ مەن اقپارات الماسۋ، قاۋىپتى اسكەري قىزمەتتىڭ الدىن الۋ تەتىگىن قۇرۋ، وقۋ-جاتتىعۋلارعا ءوزارا شاقىرۋ، ەكى ۇيىمنىڭ باسشىلىعى مەن ورگاندارى اراسىنداعى تىكەلەي ديالوگتى دامىتۋ سياقتى ءبىرقاتار پراكتيكالىق باستامالار بار.

سونداي-اق، بىشكەكتەگى كەزدەسۋدە سىرتقى ىستەر مينيسترلەرى بەلارۋستىڭ ەكىنشى دۇنيەجۇزىلىك سوعىس كەزىندە بوساتىلۋىنا 75 جىل تولۋىنا وراي بىرلەسكەن مالىمدەمە جاسادى.

قىرعىزستان استاناسىنداعى كەزدەسۋدىڭ پراكتيكالىق ناتيجەلەرىنىڭ ءبىرى ۇ ق ش ۇ س ى م ك- ءنىڭ ۇجىمدىق قاۋىپسىزدىك كەڭەسىنە  ۇ ق ش ۇ باس حاتشىسى قىزمەتىنە بەلارۋس رەسپۋبليكاسىنان كەلىسىلگەن كانديداتۋرانى ۇسىنۋ تۋرالى شەشىمىنە قول قويۋ بولدى.

جالپى، وتىرىس قورىتىندىسى بويىنشا قابىلدانعان قۇجاتتار ۇيىمدى ودان ءارى نىعايتۋعا باعىتتالعان، ال بۇل كەزەكتى رەت ۇ ق ش ۇ- نىڭ اشىقتىعىن جانە ونىڭ باسقا ەلدەرمەن جانە حالىقارالىق قۇرىلىمدارمەن ىنتىماقتاستىقتى كەڭەيتۋگە وڭ كوزقاراسىن كورسەتتى.

ۇ ق ش ۇ سىرتقى ىستەر مينيسترلەرى كەڭەسىنىڭ كەلەسى وتىرىسى بىشكەكتە 2019-جىلعى 28- قاراشاعا جوسپارلانعان ۇ ق ش ۇ ۇجىمدىق قاۋىپسىزدىك كەڭەسىنىڭ سەسسياسى قارساڭىندا وتەدى.

ۇ ق ش ۇ 2002-جىلعى 7- قازاندا كيشينيەۆ قالاسىندا قۇرىلدى. بەلگىلى بولعانداي، ۇيىمعا قازاقستاننان باسقا ارمەنيا، بەلارۋس، قىرعىزستان، رەسەي جانە تاجىكستان كىرەدى.

ۇ ق ش ۇ قۇرۋدىڭ نەگىزگى ماقساتتارى بەيبىتشىلىكتى، حالىقارالىق، وڭىرلىك قاۋىپسىزدىك پەن تۇراقتىلىقتى نىعايتۋ، ۇجىمدىق نەگىزدە ۇيىمعا مۇشە مەملەكەتتەردىڭ تاۋەلسىزدىگىن، اۋماقتىق تۇتاستىعى مەن ەگەمەندىگىن قورعاۋ بولىپ تابىلادى، ولارعا قول جەتكىزۋدە ساياسي-ديپلوماتيالىق قۇرالدارعا باسىمدىق بەرىلەدى.