كورەيا ساراپشىسى باسپانامەن قامتۋدىڭ ءتيىمدى تاجىريبەسى تۋرالى ايتتى
«سوعىستان كەيىنگى كەزەڭدە كورەيا رەسپۋبليكاسىنىڭ ۇكىمەتى ەكونوميكالىق وسىمگە اسا نازار اۋداردى. كورەيا يندۋستريالاندىرۋ كەزەڭىنەن ءوتتى، بۇل تۇرعىدا قارقىندى ۋربانيزاتسيا مەن حالىق سانىنىڭ جىلدام ءوسۋى سەكىلدى ءتيىستى ماسەلەلەر تۋىندادى. سوندىقتان ءبىزدىڭ ۇكىمەت باسپانا سالۋعا تىڭ سەرپىن بەرۋ ءۇشىن تۇرعىن ءۇي قۇرىلىسىنىڭ اكتىسىن ەنگىزدى»، - دەدى لي چاە كۆان «قولجەتىمدى تۇرعىن ءۇيدىڭ زاماناۋي ەكوجۇيەسىن قۇرۋداعى مەملەكەتتىڭ ءرولى» اتتى پانەلدىك سەسسيادا.
ونىڭ سوزىنە قاراعاندا، كورەيادا اتالعان كەزەڭدە باسپانامەن قامتاماسىز ەتۋ دەڭگەيى وتە تومەن بولدى. حالىقتىڭ سانى جىلدام وسكەندىكتەن، ەكى وتباسى ءبىر ۇيدە تۇرۋعا ءماجبۇر بولدى.
«وسى ورايدا، كورەي ۇكىمەتى باسپانا ۇسىنىسىن جىلدامداتۋ ءۇشىن ەكونوميكالىق دامۋدىڭ جاڭا ساياساتىن بەكىتۋ شەشىمىن جاسادى. 80- جىلدارى ۇكىمەت الەۋمەتتىك تۇراقتىلىق تۇرعىسىندا باسپانامەن تولىققاندى قامتاماسىز ەتۋ ەڭ ماڭىزدى ماسەلە ەكەنىن ءتۇسىندى. سوندىقتان سەۋل قالاسى ماڭىندا اۋقىمدى كولەمدە تۇرعىن ۇيلەر سالىنا باستادى. وسى جوسپاردى قارجىلاندىرۋ ءۇشىن ۇلتتىق تۇرعىن ءۇي قورى 1981-جىلى ىسكە قوسىلدى»، - دەدى سپيكەر.
ونىڭ اتاپ وتۋىنشە، ۇلتتىق تۇرعىن ءۇي قورىن كورەيا رەسپۋبليكاسىنىڭ ۇكىمەتى باسقارادى، ونىڭ اكتيۆىندە 163 ميلليارد دوللار قامتىلعان.
بۇدان بولەك، ول حالىقتى باسپانامەن قاماتاماسىز ەتۋ بويىنشا اتالعان كورپوراتسيانىڭ جوسپارى تۋرالى ايتىپ بەردى.
«كورەي ۇكىمەتى تابىسى تومەن تۇرعىندارعا، جاس وتباسىلار مەن جاستار ءۇشىن بەيىمدەلگەن باسپانانى ۇسىنۋدى جوسپارلاپ وتىر. بۇل رەتتە ارنايى اۋداندار سالىنادى. ەگدە جاستاعى ادامدار ءۇشىن بولەك ينفراقۇرىلىم قاراستىرىلادى. تابىسى تومەن ادامدار ۇكىمەت قولداۋىمەن جالعا بەرىلەتىن پاتەرلەردە تۇرا الادى»، - دەدى ساراپشى.
سونىمەن قاتار، لي چاە كۆان قازاقستاندا تۇرعىن ۇيمەن قامتاماسىز ەتۋ قادامدارى بويىنشا قاي باعىتتا ىلگەرىلەۋ كەرەكتىگىن ايتتى.
«قازاقستاندا باسپانا سانىن ارتتىرۋمەن قاتار، ساپانى كوتەرۋ شارالارىنا ءمان بەرۋ كەرەك. جاس وتباسىلار مەن حالىقتىڭ باسقا دا بولىگىن قامتاماسىز ەتۋ ءۇشىن قارجىلاندىرۋدى ەسكەرىپ، ولار ءۇشىن قولجەتىمدى باسپانا ۇسىنۋ قاجەت»، - دەدى ول.
بۇدان بۇرىن حابارلانعانداي، ا ە ف-2019 اياسىنداعى پانەلدىك سەسسيادا «بايتەرەك» ۇ ب ح» ا ق باسقارما ءتوراعاسىنىڭ ورىنباسارى ءانۋار ومارقوجايەۆ حالىقتى تۇرعىن ۇيمەن قامتاماسىز ەتۋ تۇرعىسىنداعى حالىقارالىق تاجىريبە تۋرالى باياندادى.
وسى ورايدا ءبىرىڭعاي وپەراتور ەنگىزۋدىڭ وڭتايلى قادامدارى اتاپ ءوتىلدى.
