ەرلان قارين: كانديداتتاردىڭ ۇگىت-ناسيحات جۇمىستارى قىزۋ ءجۇرىپ جاتىر
«ءۇش كۇن بۇرىن عانا ەلىمىزدە سايلاۋ كامپانياسى باستالىپ كەتتى. پروتسەسس ايتارلىقتاي قىزۋ ءجۇرىپ جاتىر. كامپانياعا ءارتۇرلى كانديداتتار قاتىسۋدا. ەشكىم دە سايلاۋ الاڭىنان ىسىرىلىپ جاتقان جوق. بەلسەندى ۇگىت جۇمىستارىن جۇرگىزۋ ءۇشىن بارىنە تەڭ مۇمكىندىكتەر، بۇقارالىق اقپارات قۇرالدارىنا تەڭ قولجەتىمدىلىك بەرىلىپ وتىر. بيلىك شىنىندا دا اشىق سايلاۋ ءارى باسەكەلى كۇرەس جۇرگىزۋگە دايىن وتىر. بۇل - قازاقستان پرەزيدەنتىنىڭ پرينتسيپتىك تۇرعىداعى پوزيتسياسى. ەلىمىزدە بولىپ جاتقان سايلاۋ پروتسەسى تاعى ءبىر اۋقىمدى پروتسەسس - بيلىك ترانزيتىنىڭ بولىگى سانالادى. الداعى كامپانيا بيلىك ترانزيتىنىڭ اقتىق كەزەڭى دەۋگە بولادى»، - دەيدى ەرلان قارين.
ونىڭ ايتۋىنشا، ەلدە شىنايى وزگەرىستەر ورىن الىپ جاتىر. بيلىك اشىق تۇردە ديالوگ جۇرگىزىپ، فورماتتى كەڭەيتۋدە.
«پرەزيدەنت ديالوگ پروتسەسىن دامىتۋ بويىنشا ءارتۇرلى باستامالاردى كوتەرىپ وتىر. بۇل - اۋقىمدى جۇمىستاردىڭ تەك باسى دەۋگە بولادى. ونىڭ جاڭا فورماتتارى دا كوپ بولماق. سول سەبەپتى، ساياسي پروتسەسس وتە بەلسەندى تۇردە جۇرۋدە»، - دەيدى ەرلان قارين.
ەسكە سالا كەتسەك، 11- مامىردا قازاقستاندا كەزەكتەن تىس پرەزيدەنت سايلاۋى الدىنداعى ۇگىت-ناسيحات شارالارى باستالعان بولاتىن. ۇگىت-ناسيحات بارىسىندا كانديداتتار ءوز ءسوزىن اشىق ايتىپ، ۇگىتتەۋگە مۇمكىندىك الدى.
بيىلعى سايلاۋ وسىمەن التىنشى رەت ءوتىپ وتىر. وسى جولى ق ر ورتالىق سايلاۋ كوميسسياسى جەتى كانديداتتى تىركەدى. ولاردىڭ ىشىندە «Nur Otan» پارتياسىنان - قاسىم-جومارت توقايەۆ، «اۋىل» حالىقتىق-دەموكراتيالىق پاتريوتتىق پارتياسىنان - تولەۋتاي راحىمبەكوۆ، قازاقستاننىڭ كوممۋنيستەر پارتياسىنان جامبىل احمەتبەكوۆ، «ۇلت تاعدىرى» ۇلتتىق-پاتريوتتىق قوزعالىسىنان ءامىرجان قوسانوۆ، «ۇلى دالا قىراندارى» رەسپۋبليكالىق قوزعالىسىنان سادىبەك تۇگەل، قازاقستان رەسپۋبليكاسىنىڭ كاسىپوداقتار فەدەراتسياسىنان امانگەلدى تاسپيحوۆ جانە «اق جول» قازاقستاننىڭ دەموكراتيالىق پارتياسىنان دانيا ەسپايەۆا بار.